Македонија има места за скапи полиња на монополот: Колку чинат?

Македонската верзија на една од најпродаваните игри во светот сè уште е во подготовка и најверојатно ќе биде испечатена за неколку месеци. Оваа игра досега во светот има над 290 милиони продадени копии, а е дизајнирана на 44 јазици во 113 земји. Но што ќе има на македонскиот монопол и кои дестинации заслужуваат да се најдат на полињата што се купуваат и издаваат? По колку пари ќе чинат на хартијата, а колку се вредни во реалноста? Разговаравме со носителот на лиценцата за креирање на македонскиот монопол, но и со туристички експерти. 

Речиси сите се согласуваат дека на македонскиот монопол треба да ги има најголемите природни богатства во земјата - трите природни езера и националните паркови, но и некои од посебните и стари локалитети. Тие генерално се синоним за туристичката понуда во Македонија - како такви би биле најсоодветни и ако се креира нов монопол на регионот Адрија. На еден таков од минатото на заедничката држава фигурираа Охридско и Преспанско Езеро и чинеа на пример помалку од Блед и Бохињ од Словенија, но речиси исто колку и сега многу познатите хрватски острови. За Попова Шапка, пак, на пример, играчот требаше да оддели многу помалку. Се смени ли нешто досега? 

Професорот Дејан Наковски од Универзитетот за туризам вели дека и сега еден од нашите главни туристички потенцијали се езерата, со посебен акцент на Охридско Езеро, кое секако е дестинација што задолжително треба да се посети. Побаравме да учествува во креирањето монополска игра за регионот, па Наковски освен Охридско Езеро и градот Охрид, ги наброја и главниот град Скопје, градот Струга, но и националниот парк Галичица и бројните манастири како дел од културно-историската и верска туристичка понуда. 

„Туристичката дестинација треба да се одликува односно во себе да содржи атрактивни атрибути што ја прават оригинална и препознатлива, добра сообраќајна и туристичка инфраструктура, соодветни сместувачки капацитети, професионално менаџирање на туристичката дестинација, квалитетен туристички кадар“, вели Наковски. 

Depositphotos

Со него се согласува и Влатко Сулев, претседател на Националната асоцијација за дојдовен туризам. 

„Охрид е најпрестижната дестинација во Македонија, на ниво на Блед и Бохињ, но не помалку популарен од еден Котор на пример. Разликата ја прави понудата на хотелското сместување. За жал, нивото на квалитет е сè уште далеку од овие дестинации и дополнителните содржини што ги нудат овие дестинации ја прават разликата“, вели Сулев. Според него, Скопје е вториот најзначаен туристички центар во Македонија, секако со својата стара чаршија, миксот на историјата и модерното и проектот „Скопје 2014“, кои го направија атрактивен град за посета. Сулев ја наведува и Битола со познатиот Широк сокак и со Хераклеја. „Маврово е нашата топ планинска дестинација што има структура, а потоа е Попова Шапка, а и двата туристички центра се далеку зад регионалните и уште подалеку од словенечките“. 

Сулев смета дека за една туристичка дестинација да е привлечна таа треба да е достапна, да има развиена првична инфраструктура, а потоа и секундарна инфраструктура, квалитетни сместувачки капацитети, привлечни атракции. Туристите, според него, бараат локални автентични искуства, интеракција со локалното население и запознавање со неговата култура, да бидат вклучени во активности, да имаат позитивен ефект кон природата и локалната заедница. 

На „Монопол Северна Македонија“ ќе има и платени полиња 

А носителите на лиценцата за „Монопол Северна Македонија“ ги прават последните истражувања пред официјалната верзија на македонскиот монопол да влезе во печат во Холандија. Поголемиот дел полиња веќе се одредени, но тие ги прашуваат и граѓаните на социјалните мрежи да кажат која дестинација е вредна да се најде на оваа игра. „И досега во Македонија беа издавани и печатени монополи на македонски јазик, но речиси сите всушност беа без лиценца. Првиот ќе излезе наскоро“, вели за „Блумберг Адрија“ Рилинд Хоџа, еден од носителите на лиценцата. Тој објаснува дека освен некои од локациите што природно се очекувани, ќе има и такви што ќе му припаѓаат на таканаречениот комерцијален дел. 

„Компании, бизниси, здруженија можат да платат и да имаат свое поле на македонскиот монопол. Тоа може да бидат некои бензински пумпи на пример, аеродром и други фирми“, објаснува Хоџа. 

Од претставувањето на „Монопол Северна Македонија“/Фото: Рилинд Хоџа/Фејсбук

Верзијата е за пет години, а потоа тие што платиле ќе треба да го продолжат или да го откажат полето. Се разбира, ако останат, треба да платат одново. 

Монополот го издава англиската компанија „Вининг мувс“ (Wining Moves), лиценциран партнер за државните изданија на Монопол од Насбро, како основач на играта во САД, во 1935 година. 

Досега свој монопол имаат Хрватска, Србија, Словенија, Црна Гора, Косово и Албанија. 

Изданието „Монопол Македонија“ има културна, историска, комерцијална и едукативна цел, преку интерактивна игра и дружба. Луѓето, не само од Македонија, туку и од светот, ќе имаат можност да научат повеќе за природните убавини, културно-историските споменици и знаменитости на секој град низ Македонија, конечно за културното наследство на нашата земја. Едновремено, преку овој проект целта е да се промовира и туризмот на Македонија низ светот.