Стартапите за вештачка интелигенција привлечен плен за технолошките гиганти

Повеќето од новите играчи на пазарот на вештачка интелигенција во текот на следните години веројатно или ќе пропаднат или ќе бидат купени од големите играчи. Како што се зголемуваат трошоците за водење бизнис, полето на вештачката интелигенција ќе биде доминиранo од „Гугл“ (Google) и „Мајкрософт“ (Microsoft), иако најдобро би било да го избегнеме тоа сценарио.

Целта на Сем Алтман да собере околу седум трилиони долари за изработка на чипови за вештачка интелигенција (ВИ) ги надминува неговите речиси луди амбиции. Прво, инфраструктурата потребна за создавање на вештачка интелигенција стана исклучително скапа. Второ, поголемиот дел од таа вредност сè уште - сè уште! - припаѓа на неколку големи технолошки компании - а олигополот само ќе се влошува.

Со сета конкуренција поттикната од лансирањето на ЧетГПТ (ChatGPT) кон крајот на 2022 година и напливот на нови стартапи кои се појавуваат на растечкиот пазар на генеративна вештачка интелигенција, повеќето од овие нови играчи веројатно ќе пропаднат или ќе бидат споени со веќе докажаните играчи во наредните години. Трошоците за водење бизнис се превисоки за да преживеете сами.

Земете ја за пример Саша Хако, главната извршна директорка на „Јунитари“ (Unitary), кој ги скенира видеата на социјалните мрежи за содржина што ги прекршува правилата. Тоа би требало да ја чини нејзината компанија сто пати повеќе од претплата на алатките на „Опен еј-ај“ (OpenAI) за видео скенирање. Затоа „Јунитари“ прави свои модели, што само по себе е напорен чин за балансирање. Нејзиниот стартап треба да изнајми пристап до оние ретки чипови за ВИ преку облак услуги од продавачи како „Мајкрософт“ и „Амазон“ (Amazon). Цената на тие чипови е двојно зголемена од 2020 година, вели Хако, и тешко е да се резервираат. „Имаше моменти кога не можевме да добиеме пристап до она што ни треба, па моравме да платиме десет пати повеќе од цената“, ми рече таа.

„Јунитари“ успева во тоа, но Хако признава дека ниту еден стартап со генеративна вештачка интелигенција не сфатил како да води евтин бизнис во обем, барем не на ист начин како што прават големите технолошки компании. Друг основач на компанија за вештачка интелигенција во Сан Франциско ми кажува дека некои од неговите колеги кои мораат да изнајмуваат чипови за ВИ преку облак, чувствуваат дека единствениот начин на кој можат да заработат пари „е ако луѓето не го користат производот“.

Bloomberg

„Најдобрата аналогија е електричната енергија“, вели Роналд Ашри, извршен директор на стартапот „Дијалог еј-ај“ (Dialogue.ai), кој создава сопствени чет-ботови за регулираните индустрии. „Вие сте приклучени во основниот модел и тоа е вашата електрична енергија и постојано ја трошите. Трошоците за потрошувачка се најголеми во решението што го доставуваме до клиентите“.

Стартапите со вештачка интелигенција можат да ја градат својата технологија на два различни начина. Тие можат да развијат сопствена верзија на ГПТ-4 (GPT-4) на „Опен еј-ај“ или Џеминај (Gemini) на „Гугл“, на пример, таканаречен основен модел кој бара стотици милиони долари инвестиции. Или можат да се надоврзат на постоечки модел, за кој се потребни само десетици милиони во инвестиции, што денес го прават огромно мнозинство на стартапи за ВИ.

Во двата случаја, главни добитници се гигантите во облак технологијата „Мајкрософт“, „Амазон“ и „Гугл“ и производителот на чипови за вештачка интелигенција „Енвидија“ (Nvidia). „Сите овие стартапи земаат пари од ризичен капитал и ги даваат на облак компаниите и 'Енвидија'“, вели Родолфо Росини, извршен директор на производителот на чипови „Ваир компјутинг“ (Vaire Computing). Како резултат на тоа, вредноста на акциите на „Енвидија“ се зголеми повеќе од двојно минатата година, на речиси два трилиони долари.

Повеќето нови стартапи за генеративна вештачка интелигенција немаат многу научници за истражување на вештачка интелигенција за да ги направат привлечни за стекнување таленти, бидејќи тие зависат од поголеми, независни модели. Овие стартапи често се екипирани со обични софтверски инженери.

Покрај тоа, големите технолошки компании како „Мета“ (Meta) веќе инвестираат многу во сопствениот внатрешен развој на вештачка интелигенција, вели Нејтан Бенаик, основач на лондонската компанија за ризичен капитал „Ер стрит“ (Air Street Capital), а многу од тие компании значително ги намалија трошоците во изминатата година.

Уште поголема пречка е регулацијата. Големите технолошки компании со право се претпазливи во однос на отфрлање на какви било големи зделки со вештачка интелигенција по неодамнешниот бран на построги антимонополски мерки. Затоа се префрлаат на инвестирање. Инвестициите на големите технолошки компании во стартапи со вештачка интелигенција достигнаа повеќе од 24,6 милијарди долари во 2023 година, што е огромен пораст од 4,4 милијарди долари во 2022 година. Ова е раст предизвикан од избегнувањето на регулаторни прегледи, според Брендан Бурк, висок аналитичар во истражувачката компанија „Пичбук“ (Pitchbook), кој исто така ги наведе посочените бројки.

Она што изгледа најверојатно: Регулаторниот притисок ќе спречи преземање на водечките стартапи со вештачка интелигенција чија вредност е над милијарда долари, како што се „Преплексити“ (Perplexity), „Кохир“ (Cohere), „Карактер еј-ај“ (Character.ai) и „Инфлекшн“ (Inflection). Наместо тоа, ќе привлече инвестиции - барем засега.