.webp){kind=icon}
Не стивнуваат реакциите во јавноста откако 1.060 функционери добија зголемување на платите од 78 проценти. Тоа доведе до драстичен пораст на примањата на одредени политичари, а пример за тоа е министерот за финансии Фатмир Бесими, кој доби покачување од 900 евра.
Објавивме дека се ретки функционерите што јавно кажаа колку им пораснала платата. Можеби се срамат, со оглед на тоа што нашата анализа покажа дека има несразмерни зголемувања на платите во јавниот сектор. Имено, некои од вработените 30 години чекаат промена на регулативата односно изедначување на методологиите за пресметка на плати во јавниот сектор, каде што сега има 200 различни системи за одредување на платите.
Со покачувањата, нашите функционери ќе можат да си дозволат да летаат во прва класа, наместо да бараат евтини летови како повеќето македонски граѓани, кои според нашето истражување со авион најчесто патуваат до Истанбул и градовите во Германија.
Зголемувањето на платите е добредојдено за функционерите и поради високата инфлација, која иако бележи знаци на забавување, сè уште се инаети кога се во прашање цените на одредени прехранбени производи. Изминатава недела пишувавме дека нема крај на вртоглавиот раст на цената на шеќерот, месото и на оризот. Тоа очигледно ќе донесе главоболки само за обичните смртници, додека функционерите на највисоки позиции ќе можат и понатаму да си пијат слатко кафе и почесто да јадат ориз со батаци.
Кога станува збор за поскапувањата, мора да се спомене и зголемувањето на кириите на станбениот простор во поатрактивните населби во Скопје. По нашата анализа на огласите за закуп воочивме дека Скопје е како Солун, со оглед на тоа што има случаи каде што за месечен закуп на гарсониера се бараат 300 евра.
Забележавме и дека некои градежни инвеститори и граѓани што продаваат станови очигледно мислат дека Скопје нуди квалитет на живеење како да е некој приморски град, со оглед на тоа што бараат од 1.800 до 2.000 евра за квадрат.
