.webp){kind=icon}
Цените на становите во Скопје во вториот квартал од годинава бележат раст од 1,6 проценти на квартално и од 12,9 проценти на годишно ниво, покажуваат податоците што денеска ги објави Народната банка. Станува збор за забавување на растот на цените на становите ако се земе предвид дека во првиот квартал од годинава, цените се зголемија за 18,8 проценти на годишно ниво.
Со тоа се остваруваат најавите за стабилизација на цените на недвижностите по драстичниот двоцифрен раст кој започна на крајот на 2021 година. Градежниците како главни причини за континуираниот раст на цените на становите во Скопје во изминатиов период ги посочуваа зголемувањето на цените на градежните материјали и на другите трошоци, како и големата побарувачка. Сепак, очигледно е дека понудата на станови веќе одамна ја задоволува побарувачката ако се земе предвид дека според последниот попис над 300.000 станови во земјава се празни.
„Блумберг Адрија“ веќе пишуваше дека меѓу главните двигатели на растот на цените на становите во изминатиов период беа банките, кои преку своите кредитни политики од една страна му даваа силна поддршка на градежниот сектор, пред сè за финансирање изградба на станбени згради, а од друга страна обезбедија ниски камати за станбените кредити наменети за населението. Меѓутоа, во меѓувреме работите се сменија. Високата инфлација ја принуди Народната банка да ја заостри монетарната политика, што резултира со зголемување на каматите на кредитите за корпоративниот сектор и за населението.
Прочитај повеќе
Зошто не може да се очекува ладење на пазарот на недвижности
И покрај стабилизацијата на цените на градежните материјали во Македонија, не може да се очекува пад на цените на становите, вели Андреа Серафимовски.
27.06.2023
Банките распродаваат живеалишта: Луксуз и багатела на едно место
На продажба се нудат куќи вредни и повеќе од 500.000 евра, но има и трошни имоти, од кои банките очигледно не можат да се ослободат.
27.06.2023
НБМ: Станбените кредити забавуваат, должниците редовни
Ја прашавме Народната банка дали континуираниот раст на цените на недвижностите во новонастанатите услови носи ризици по македонската економија, односно по финансиската стабилност.
22.06.2023
Ако не може стан во центар, може куќа на периферија
Се остваруваат прогнозите за мал пад на цените на становите.
17.05.2023
Скопје како Солун: Месечен закуп на гарсониера и до 300 евра
Во многу случаи цените за закуп на станови во Скопје се повисоки отколку во Солун.
17.05.2023
Од НБМ неодамна за „Блумберг Адрија“ соопштија дека стапката на раст на станбеното кредитирање исто така забавува, а портфолиото на станбени кредити е здраво и со највисок квалитет и засега нема знаци за остварување на кредитниот ризик.
Инаку, новите податоци за цените на становите во Скопје покажуваат дека се остваруваат прогнозите на аналитичкиот тим на „Блумберг Адрија“ од крајот на 2022 година. Тие тогаш предвидоа дека градежната активност годинава ќе се намалува и дека ќе паднат цените на становите. Според извештајот на аналитичкиот тим на „Блумберг Адрија“, во 2023 година цените на недвижностите ќе забележат голема корекција во целиот регион, а намалувањето, споредено со нивото од 2022 година, ќе биде во просек за десет проценти.
