.webp){kind=icon}
Метеоролошката служба на Австралија деновиве е изложена на сериозни критики поради тоа што не ги известила навреме граѓаните за смртоносните бури од надоѓањето на циклонот Џаспер во Квинсленд. Тамошните власти признаа дека се потребни промени во системот за прогнозирање бидејќи климатските промени носта екстремни временски појави кои не можат да се предвидат. Климатските промени носат проблеми и во Македонија и поширокиот регион, кои посебно се манифестираат во туризмот.
Добро утро, подолу петте вести што ги издвоивме за почеток на денот.
За зимски туризам имаме само желба
Првото нешто што е потребно за зимски туризам е снег, второто нешто се добри патишта за брзо да се стигне до зимските туристички центри. Во моментов, за жал, Македонија има само по малку и од двете нешта. 2022 година беше уште една од низата години кога во градовите не видовме снег ниту еден ден.
На високите места имаше колку да ги обои во бело, за зимски туризам – немаше доволно. Македонија има два зимски туристички центра - Попова Шапка и Маврово. Во овие над 30 години од независноста се зборуваше за многу проекти, најфален меѓу нив беше тој за ски-центарот Кожуф. Ништо не се реализира.
Ренесанса на скијачките центри во регионот Адријa
„За незаборавно слободно скијачко искуство, Македонија е вистинскиот избор. Се разбира, тука е и северот на Франција, уште подобро Канада или Соединетите Американски Држави, но Македонија е доста блиску“, вели страсниот скијач Митја Урх, кој инаку е вработен во компанијата „Елан“, која произведува спортска опрема и е позната по своите скии.
Иако пристигнувањето на скопскиот аеродром со ски-опрема некому му изгледа смешно, Словенецот веќе размислува повторно да ја посети Попова Шапка, бидејќи тој е воодушевен од ски-центарот на Шар Планина. Иако Македонија може да изгледа како малку егзотична скијачка дестинација, сè повеќе луѓе од регионот ги посетуваат нејзините скијачките центри.
Почнува нова ера за корпоративното оданочување во ЕУ
Нови револуционерни правила на ЕУ стапуваат на сила денеска со воведување минимална стапка на ефективно оданочување од 15 проценти за мултинационалните компании активни во земјите-членки на ЕУ. „Рамката ќе донесе поголема правичност и стабилност на даночниот пејзаж во ЕУ и на глобално ниво, а истовремено ќе го направи помодерен и подобро прилагоден на денешниот глобализиран, дигитален свет.“, соопшти Европската комисија.
Влегувањето во сила на минималното ефективно оданочување, едногласно договорено од земјите-членки во 2022 година, го формализира спроведувањето на таканаречените правила од „столбот 2“ кои се дел од глобалниот договор за меѓународна даночна реформа во 2021 година.
Данската кралица абдицира по 52 години на тронот
Данската кралица Маргрета Втора, монарх со најдолг стаж во светот, рече дека ќе му ја предаде функцијата на својот син по 52 години на тронот. Кралицата (83) наведе дека влошувањето на нејзиното здравје е главната причина за нејзината одлука, во говорот во неделата пред нацијата. Таа формално ќе се повлече на 14 јануари, оставајќи го тронот на нејзиниот најстар син, 55-годишниот престолонаследник Фредерик.
„Одлучив дека сега е вистинското време“, рече кралицата во нејзиниот новогодишен говор на телевизија. „Времето поминува, а болестите се множат. Човек повеќе не може да се носи исто како порано“, вели таа. По смртта на британската кралица Елизабета Втора во 2022 година, која беше блиска пријателка и далечна роднина, Маргрете стана најдолго владејачки монарх во светот. Хасанал Болкија, султанот од Брунеи, ја има титулата владетел подолго од Маргрете, но неговата земја стана независна дури во 1984 година.
Новата година носи нов ценовник за патарините во Србија
Од 1 јануари 2024 година ќе почне наплатата на патарините на одредени новоизградени делници од автопатиштата во Србија, а ќе се воведе и нов ценовник за користење на одредени патни објекти, соопштија од јавното претпријатие „Патишта Србија“. Како што наведоа, отсега патарина ќе се наплаќа на Моравскиот коридор (до привремената предна наплатна станица Кошеви) и на автопатот Рума-Шабац.
„Се воведува и наплатата на надоместоци за користење на патни објекти: мостови, вијадукти и тунели, така што висината на патарината по поминат километар се зголемува за 50 отсто за мостовите и вијадуктите или за 100 отсто за тунелите.“, пишува во соопштението на компанијата.
