.webp){kind=icon}
Германското индустриско производство неочекувано се намали во ноември, нагласувајќи ги веќе подолготрајните постојани производствени проблеми во најголемата европска економија. Производството се намали за 0,7 отсто во однос на октомври, предводено од капиталните производи и интермедијарните производи. Неповолните текови во германската економија веќе се чувствуваат и во Македонија.
Добро утро, подолу петте вести што го издвоивме за почеток на денот.
За пет месеци извозот кон Германија ни се намалил за над 15 проценти
Во првите единаесет месеци од 2023 година, извозот на стоки од Македонија е во вкупна вредност од 7,7 милијарди евра и забележа раст од 0,2 отсто во споредба со истиот период во 2022 година. Вредноста на увезената стока од јануари до крајот на ноември лани изнесува 10,2 милијарди, што е за 8,3 отсто помалку во споредба со претходната година, објави Државниот завод за статистика.
Кога ќе го погледнеме периодот од јули до ноември во 2023 година, може да забележиме пад на извозот за 5,8 отсто откако порасна во првата половина на 2023 година, според аналитичарите на „Блумберг Адрија“. „Причината за тоа е забавувањето на Европската Унија (ЕУ), која е главен извозен партнер на Македонија, но особено падот на извозот во Германија од 15,2 отсто од седмиот до единаесеттиот месец 2023 година“, вели Михаел Блажековиќ, аналитичар на пазари.
Пет клучни графикони за глобалните пазари на стоки во 2024 година
Добредојдовте во 2024 година! Екстремните временски услови, економската несигурност и зголемените геополитички ризици од Украина и Русија до Израел и поширокиот Блиски Исток беа доминантни теми минатата година и ќе бидат дел од приказната во неделите и месеците што следат.
Зголемените тензии во Црвеното Море ги нарушија испораките со контејнери преку клучниот трговски пат, зголемувајќи ги изгледите за поскапување на стоките бидејќи бродовите се принудени да пловат по подолги рути. Додека трговците со нафта во голема мера ги минимизира ефектите од конфликтот во последните деновите од 2023 година, во првите сесии на тргување во јануари таа повторно покажува нестабилност.
Прогноза: Геополитиката ќе ги диктира цените на гасот и нафтата во 2024 година
Факт е дека движењето на цените на гасот и нафтата е тешко да се предвиди. Тешко е поради тоа што е комплицирано предвидувањето на настаните во геополитиката, кои се клучен фактор за креирање на цените на суровините. Сведоци сме на тоа низ историјата, особено во последните две години по војната во Украина и Газа. Геополитичките настани, пред сè понатамошните случувања во Украина и на Блискиот Исток, ќе ги диктираат цените на суровините и во текот на 2024 година, велат енергетските експерти за „Блумберг Адрија“.
Тие укажуваат дека и покрај желбата на големите сили да се префрлат од фосилни горива на обновливи извори на енергија што е можно поскоро, со цел да се намалат емисиите на јаглерод диоксид, гасот и нафтата сè уште играат клучна улога. Ова значи дека ерата на фосилните горива не само што не е завршена, туку овие горива продолжуваат да ја обликуваат глобалната економија и остануваат во центарот на мешавината на геополитички, економски и еколошки фактори.
Значително забави растот на цените на становите во Скопје
Цените на становите во Скопје во четвртиот квартал од 2023 година за зголемиле за седум проценти во однос на истиот период претходната година, покажува индексот на цените на становите што го изготвува Народната банка. Станува збор за значително забавување на растот на цените кој во изминативе години континуирано беше над двоцифрената граница на квартално ниво.
Според Ивица Јакимовски од Градежната комора при Сојузот на стопански комори, цените годинава нема да растат. „Само во тоа сум сигурен, дека нема простор за раст на цените на становите. Дали има простор за намалување, во овој момент не сум сигурен. Имаме стабилни цени на градежни материјали, значи од таа страна немаме проблем. Но, имаме проблем на страната на работната сила. Недостигот на работници создава притисок за раст на платите, што може да биде вистински товар во наредниот период“, вели тој.
Инфлација од 9,4 проценти во Македонија во 2023 година
Според податоците на Државниот завод за статистика, индексот на трошоците на животот во 2023 година, во однос на 2022 година, бележи пораст од 9,4 отсто, а индексот на цените на мало е 7 отсто. Стапката на инфлација во декември, според Државниот завод за статистика, изнесувала 3,6 отсто, додека индексот на цените на мало забележал пораст од 3,7 отсто.
Зголемувањето на индексот на трошоците на животот во декември 2023 година, во споредба со претходниот месец, е резултат на повисоките индекси на виното за 1,3 отсто, прехранбените производи неспоменати на друго место за 0,7 отсто, пивото за 0,6 отсто, свежиот и разладениот зеленчук, освен компирите и другите коренести плодови, за 0,3 отсто, месото, шеќерот, џемот, медот, чоколадата и кондиторските производи за 0,2 отсто.
