.webp){kind=icon}
Американскиот претседател Џо Бајден рече дека САД не ја поддржуваат независноста на Тајван, откако тамошните гласачи се спротивставија на Кина и ѝ дадоа трет последователен мандат на владејачката Демократска напредна партија - која се обидува да го ограничи влијанието на Пекинг.
Нејзиниот кандидат Лаи Чинг-те победи на претседателските избори во Тајван, а неговите противници го признаа поразот.
„Ние не ја поддржуваме независноста“, им рече Бајден на новинарите во саботата кога заминуваше од Белата куќа за Кемп Дејвид.
Се чини дека коментарот на претседателот има за цел да ја намали загриженоста во Кина, која се надеваше дека Лаи Чинг-те нема да биде избран за претседател.
Добро утро! Ова се петте вести што треба да ги знаете на почетокот од денот.
Лажните вести во година на избори главна тема на самитот во Давос
Лажните информации претставуваат најголема закана во следните две години, во контекст на големиот број избори закажани ширум светот и економска стагнација, покажува истражување на Светскиот економски форум.
Организацијата со седиште во Женева, која од денеска ќе биде домаќин на светската елита во швајцарското алпско одморалиште Давос, истакна зголемена загриженост за потенцијалот за манипулации врз гласачите.
Светскиот економски форум предупредува дека широката употреба на дезинформации и лажни вести може да го загрози легитимитетот на новоизбраните влади. Тоа може да доведе и до насилни протести, а во некои случаи дури и до тероризам.
Аналитичари од пет земји ни дадоа прогнози за берзите во 2024 година
Ретки се оние што очекуваа дека дел од светските берзански индекси ќе доживеат рекорден раст во 2023-та, година која ја одбележаа затегнувањето на монетарната политиката односно борбата на централните банки против високата инфлација, новите геополитички тензии на Блискиот Исток кои се надоврзаа на војната во Украина, како и технолошкиот бум што го предизвика вештачката интелигенција.
Тимот на „Блумберг Адрија“ побара мислења од аналитичари од пет земји (Македонија, Србија, Хрватска, Словенија и БиХ) за нивните прогнози за движењата на пазарите на капитал и воопшто за економијата во 2024-та година.
Аналитичарите велат дека и за оваа година има позитивни знаци на хоризонтот. Оптимизмот уште повеќе се шири по сигналите што ги испраќаат централните банки, според кои се гледа крајот на монетарното затегнување...
Bloomberg Adria
Алтернативите ќе ја движат индустријата за безалкохолни пијалаци
Генерално, растечките цени во регионот не го прескокнаа сегментот на пијалаци, посочуваат од аналитичкиот тим на „Блумберг Адрија“ во новата регионална анализа на индустријата на безалкохолни пијалаци.
Тие додаваат дека силната побарувачка на потрошувачите во регионот го поддржа нагорниот раст на цените, дозволувајќи им на производителите да ги копираат зголемените трошоци на нивните продажни цени.
Во однос на зголемената жед за алтернативни пијалаци, аналитичарите сметаат дека компаниите што се движат стратегиски со диверзификација на портфолиото и истражуваат нови пазарни патишта, најверојатно, ќе воспостават посилна долгорочна позиција.
Пакуваната вода содржи повеќе пластични честички отколку што досега се мислеше
Типично шише вода од еден литар содржи во просек околу 240.000 пластични фрагменти, покажа нова студија. Многу од тие фрагменти останале неоткриени низ историјата, утврдиле истражувачите, сугерирајќи дека здравствените проблеми поврзани со загадувањето од пластика можеби се драматично потценети.
Наодите покажуваат дека пакуваната вода во пластична амбалажа може да содржи до 100 пати повеќе пластични честички од претходните проценки, бидејќи студиите во минатото го следеле присуството само на микропластика, или парчиња од еден до 5.000 микрометри, но не и на поситната нанопластика.
Новото истражување предупредува на присуство на нанопластика во пакуваната вода, односно честички кои се толку мали што може да навлезат во човечките клетки, во крвотокот и да влијаат на органите.
Чешка и Словачка под удар на транзицијата кон електрични возила
Чесите и Словаците произведуваат повеќе автомобили по жител од кој било друг во светот. Но, сега транзицијата кон електрични возила става во опасност голем број на работни места.
Во Словачка, 260.000 луѓе се вработени во четири производители на автомобили и околу 350 добавувачи. Во Чешка, бројот на вработени во секторот е речиси двојно поголем.
Притисокот доаѓа од фактот што конвенционалното возило има 200 или повеќе подвижни делови, додека електричните возила имаат само една десетина од тој број. Нема потреба од некои делови како што се инјектори за гориво или издувни системи...
