.webp){kind=icon}
Ова е голема година за демократијата. Речиси половина од светското население ќе гласа на национални избори во 2024-та. Последниот пат кога многу од овие земји излегоа на гласање немаше ЧетГПТ (ChatGPT).
Овие две теми постојано се споменуваат на панелите и настаните на Светскиот економски форум што неделава се одржува во Давос, Швајцарија. Често се поставуваат прашања за тоа како едното ќе влијае на другото.
Некои од лидерите во областа на вештачката интелигенција во вторникот зборуваа во просториите на „Блумберг“ во Давос. Сите рекоа дека сериозно ја сфаќаат заканата што ја претставува вештачката интелигенција за изборите, но не се согласуваат околу веројатноста тие закани да се реализираат.
Извршниот директор на „Мајкрософт“ (Microsoft Corp.), Сатја Надела, донекаде ги ублажи ризиците. „Не е дека ова ќе бидат први избори на кои дезинформациите и мешањето во изборите ќе бидат предизвик со кој треба да се справиме“, рече тој.
Сатја Надела
Bloomberg
Подоцна во текот на денот извршниот директор на „Опен еј-ај“ (OpenAI Inc.), Сем Алтман, го повтори тоа мислење, но изрази поголема неизвесност. „Мислам дека нема да биде исто како порано“, рече тој. „Секогаш е грешка да се води завршена војна“.
Соосновачот на „Мајкрософт“, Бил Гејтс, предвиде дека „лошите момци ќе бидат попродуктивни“ со вештачката интелигенција, зборувајќи во интервју со репортерката на „Блумберг“ Франсин Лаква.
Во меѓувреме, извршниот директор на „Сејлсфорс“ (Salesforce Inc.), Марк Бениоф, сугерираше дека социјалните мрежи претставуваат поголем ризик за демократскиот процес отколку вештачката интелигенција. „Регулаторите не ја завршија својата работа“, рече тој.
Компанијата „Опен еј-ај“, во која „Мајкрософт“ е најголем инвеститор, е многу фокусирана на намалување на потенцијалот за политичка злоупотреба на алатките што ги произведува, како што се ЧетГПТ и Дали (Dall-E), рече Алтман.
Во мај Алтман и Надела присуствуваа на состанокот со потпретседателката на САД, Камала Харис, за да разговараат за ризиците од вештачката интелигенција. „Опен еј-ај“ наскоро ќе објави тест-верзија на алатка што може да ја идентификува содржината генерирана со вештачка интелигенција и ќе става жиг на материјалот генериран од Дали, соопшти стартапот во понеделникот. Оттаму постојано повторуваат дека употребата на моделите на „Опен еј-ај“ за политичка кампања не е дозволена.
„Не сме комотни“, рече Алтман. „Ќе мора неверојатно внимателно да го следиме процесот годинава“.
Што се однесува на тоа како политиката ќе влијае на вештачката интелигенција, Алтман беше помалку загрижен. „Верувам дека Америка ќе биде добро што и да се случи на овие избори и дека вештачката интелигенција ќе биде добра по тоа“, рече тој.
Потпретседателката за глобални прашања на„Опен еј-ај“, Ана Маканџу, рече дека е охрабрена од предложената регулатива од претседателот Џо Бајден и Европската Унија. „Она што ме изненади, а што беше навистина извонредно, е тоа што и двете страни учествуваа во разговорот за вештачката интелигенција“, рече таа.
Алтман на некој начин се согласи: „Двете страни го мразат ова“.
