„Опен еј-ај“ ѝ предлага на Белата куќа изградба на огромни центри за податоци

„Опен еј-ај“ (OpenAI) ѝ претстави на администрацијата на Бајден потреба од изградба на масивни центри за податоци, од кои секој би користел енергија колку и цели градови, велејќи дека ваквата експанзија без преседан е неопходна за развој на понапредни модели на вештачка интелигенција и натпревар со Кина.

По неодамнешната средба во Белата куќа, на која присуствувал извршниот директор на „Опен еј-ај“, Сем Алтман, заедно со други технолошки лидери, стартапот споделил документ со владини службеници, во кој ги наведува економските и националните безбедносни придобивки од изградба на центри за податоци со капацитет од пет гигавати во различни држави во САД, базирано на анализа што компанијата ја спровела со надворешни експерти. За споредба, пет гигавати е приближно еквивалентно на пет нуклеарни реактори или доволно за снабдување речиси три милиони дома.

Според документот, во кој „Блумберг њуз“ (Bloomberg News) имал увид, „Опен еј-ај“ истакнува дека инвестирањето во овие капацитети би резултирало со десетици илјади нови работни места, зголемување на бруто-домашниот производ и осигурување дека САД ќе го задржат своето водство во развојот на вештачката интелигенција. За да се постигне тоа, сепак, САД треба да воведат политики што поддржуваат поголем капацитет на центри на податоци.

Алтман помина голем дел од годинава обидувајќи се да формира глобална коалиција на инвеститори за финансирање на скапата инфраструктура потребна за поддршка на брзиот развој на вештачката интелигенција, додека истовремено работеше на обезбедување поддршка од владата на САД за проектот. Но детали за енергетскиот капацитет на дата-центрите што Алтман и „Опен еј-ај“ ги предлагаат претходно не беа објавени.

„'Опен еј-ај' активно работи на зајакнување на инфраструктурата за вештачка интелигенција во САД, што веруваме дека е клучно за одржување на Америка на чело на глобалната иновација, зајакнување на реиндустријализацијата низ целата земја и правење на придобивките од вештачката интелигенција достапни за секого“, истакна портпарол на „Опен еј-ај“ во изјава за „Блумберг њуз“.

Оваа иницијатива се случува во време кога енергетските проекти во САД се соочуваат со доцнења поради долгото чекање за поврзување со мрежите, проблеми со дозволите, проблеми со синџирот на снабдување и недостиг од работна сила. Но енергетските директори изјавија дека дури и напојувањето на еден единствен дата-центар од пет гигавати би било предизвик.

Џо Домингез, извршен директор на „Констелејшн енерџи“ (Constellation Energy Corp.), изјави дека слушнал дека Алтман зборува за изградба на пет до седум дата-центри, од кои секој е со капацитет од пет гигавати. Документот споделен со Белата куќа не наведува конкретен број. Целта на „Опен еј-ај“ е да се фокусира на еден дата-центар за почеток, но со планови за потенцијално проширување, според лице запознаено со оваа прашање.

„За што и да зборуваме, не е само нешто што никогаш не било направено, туку не верувам дека е изводливо како инженер, како некој што израснал во оваа индустрија“, изјави Домингез за „Блумберг њуз“. 

САД имаат вкупно инсталиран капацитет на нуклеарна енергија од 96 гигавати. Минатата недела најголемиот инвеститор на „Опен еј-ај“, „Мајкрософт“ (Microsoft Corp.), склучи договор со „Констелејшн“, со кој нуклеарниот снабдувач ќе ја рестартира затворената централа „Три мајл ајленд“ (Three Mile Island) исклучиво за да обезбеди нуклеарна енергија за „Мајкрософт“ за две децении.

Во јуни Џон Кетчум, извршен директор на „Некст ера енерџи“ (NextEra Energy Inc.), изјави дека гигантот за чиста енергија добил барања од некои технолошки компании да најде локации што можат да поддржат побарувачка од пет гигавати, без да именува конкретни компании. „Размислете за тоа. Тоа е големина на снабдување со енергија на градот Мајами“, рече тој.

Толку голема моќ би барала комбинација на нови ветерни и соларни електроцентрали, складирање со батерии и поврзување со мрежата, рече Кетчум. Тој додаде дека наоѓањето локација што може да поддржи пет гигавати ќе бара извесен напор, но има места во САД каде што може да се смести еден гигават.