.webp){kind=icon}
Во неделава што следува ќе се одвиваат подготовките за техничката влада што треба да финишираат со гласање најдоцна в недела, на 28 јануари. Тоа подразбира оставки од претседателот на Собранието Талат Џафери и од премиерот Димитар Ковачевски, избор на нов претседател на Собранието, а исто така следува верификација на нов мандат на пратеник на местото на Џафери и евентуално на други пратеници во зависност од тоа дали некои од нив ќе преминат во извршната власт. Со други зборови, неофицијално почнува изборниот циркус.
Добро утро, ова се петте вести што ги издвоивме за почеток на денот.
Светот се врти кон зелено кредитирање, Македонија сè уште се освестува
Втора година по ред глобалните банки заработија повеќе пари преку преземање обврзници и обезбедување заеми за зелени проекти отколку што заработија од финансирање активности за нафта, гас и јаглен. Во светот веќе извесен период му се дава приоритет на таканареченото зелено кредитирање на еколошки прифатливи идеи и бизниси. Анализиравме каде е Македонија наспроти светските трендови.
Најголемите светски кредитори лани генерирале такси од околу три милијарди долари од порамнувањето на долговите за зделки што се продаваат како еколошки, според податоците на „Блумберг“. За споредба, секторот имаше помалку од 2,7 милијарди долари збирна заработка од трансакции со фосилни горива.
ББА-анализа: Корпоративните ЕСГ-обврзници табу-тема во Македонија
Емисиите на ЕСГ-обврзници лани се намалија во однос на 2022 година, а намалувањето е многу позначајно во однос на рекордната 2021 година. Во најновата регионална анализа што ја подготви аналитичкиот тим на „Блумберг Адрија“ се наведува дека минатата година вкупниот износ на обврзници за одржливост на глобално ниво е за 16 отсто помал од 2022 година, а во однос на 2021 година намалувањето изнесува дури 28 отсто.
Со ЕСГ-обврзниците државите и компаниите собираат пари за да ги подобрат своите практики што се однесуваат на животната средина, општествената одговорност и корпоративното управување (ESG - Environmental, Social and Governance). Најголем дел од ЕСГ-обврзниците во 2023 година бил издаден од јавниот или финансискиот сектор, а помалку од компаниите.
Пет причини зошто часовниците се попрофитабилна инвестиција од златото
Традиционалните инвестиции како акции, благородни метали и недвижности полека наидуваат на конкуренција во форма на алтернативни ресурси. Меѓу овие извори на инвестиции, часовниците може да се сметаат за единствена и исклучително профитабилна опција. И покрај тоа што пазарот беше нестабилен и чувствителен на надворешни влијанија во последната година, тој расте на долг рок и може да биде стабилна инвестиција поради својата вредност.
Според податоците добиени од „Бостон консалтинг груп“ (Boston Consulting Group), во соработка со продавачот на луксузни часовници „Вочбокс“ (WatchBox), чии клиенти се Мајкл Џордан и Бил Ајкман, вредноста на часовниците од брендовите како „Ролекс“ (Rolex), „Патек Филип“ (Patek Philippe) и „Одемарс Пиге“ (Audemars Piguet) ќе се зголеми за 20 проценти. За секој што сака брз пристап до своето богатство, часовниците се одлична опција затоа што можат брзо да се продадат и да се вратат со висок степен на сигурност, бидејќи - можете да го осигурите часовникот, но не и парите.
Кои се најдобрите градови за европските иселеници?
Најдобрите градови во светот за Европејците се во Европа. Како што растат тензиите низ светот, градовите во Швајцарија, Холандија и во Скандинавија се меѓу најдобрите за живеење за Европејците за 2023 година на листата на „ЕЦА интернешнл“ (ECA International), глобална консултантска компанија за работна сила. Три топ града на листата се Берн (Швајцарија), Ајндховен (Холандија) и Ставангер (Норвешка).
Во меѓувреме, Хонгконг (110.), Киев (218.) и Москва (189.) паднаа во рангирањето, бидејќи геополитиката и војната го влошија квалитетот на животот на жителите таму. Студијата, која испитуваше 500 града низ светот, ги зеде предвид здравствените услуги, домувањето, пристапот до рекреативни објекти и други фактори, вклучувајќи ги и загадувањето на воздухот, личната безбедност и социјалните и политичките тензии.
Две компании од Македонија на листата на топ работодавци
На глобалната листа на врвни работодавци, објавена од институтот „Топ работодавци“ (Top Employers Institute) од Амстердам, се вклучени 29 компании од регионот Адриjа. Меѓу 2.300 сертифицирани организации во 121 земја, 16 компании од Србија, пет од Словенија, четири од Хрватска и по две од Босна и Херцеговина (БиХ) и од Македонија ја добија титулата за најдобри работодавци.
Од Македонија на листата најдобри се најдоа компаниите од автомобилската индустрија – „Леар“ (Lear Corporation Macedonia Tetovo Trim Plant) и „Адиент“ (Adient Macedonia.) Институтот идентификуваше две компании од БиХ како врвни работодавци, групацијата „Хемофарм“ во областа на фармацевтските производи и „Молсон Коорс“ во областа на стоки за широка потрошувачка, услуги, храна и пијалаци.
