Светот задоцни во случајот со мајмунските сипаници

Во Демократска Република Конго со месеци циркулира мутирана форма на мајмунски сипаници. Сега, пак, справувањето со она што стана глобална здравствена криза се соочува со клучна пречка: земјата сè уште нема ниту една вакцина.

Недостигот од вакцини и предизвиците во разбирањето на ширењето на болеста во централноафриканската земја укажуваат дека застојот на теренот, недостигот од меѓународна координација и проблемите со финансирањето спречија брз одговор.

Синџирот на одложени одговори на кризата започна за време на последната вонредна состојба на сипаници, која заврши во 2023 година, а Африканскиот центар за контрола и превенција од болести соопшти дека континентот не добил соодветна поддршка.

Иако заканата од мајмунски сипаници се врати и организацијата одговорна за глобалната дистрибуција на вакцини изрази загриженост, Конго се откажа од официјалното барање за донации на вакцини. Регулаторите за лекови во земјата одобрија итна употреба на инјекциите во јуни.

Во меѓувреме многу земји, организации и потенцијални донатори се обидуваат да помогнат, но само што почнуваат да се координираат за заеднички одговор.

„Мислам дека светот не научи дека нема смисла да ѝ се стави крај на итната состојба на Светската здравствена организација минатата година“, рече во интервју Тулио де Оливеира, директор на Центарот за одговор на епидемијата и иновации на универзитетот „Стеленбош“. „Да научевме, ќе се фокусиравме на запирање на епидемијата. Некои експерти не се согласуваат дека прогласувањето вонредна состојба требало да продолжи“.

Според Питер Сендс, шеф на Глобалниот фонд за борба против сида, туберкулоза и маларија, фокусот на светот бил на друго место. Мајмунските сипаници се во Конго долго време и „не привлекоа големо внимание“, рече Сендс во едно интервју.

Војната и другите закани бараат внимание од владите од крајот на пандемијата на ковид-19. Но епидемијата на сипаници треба да биде потсетник дека ако се занемарат надзорот на болеста и основната примарна грижа, „тоа може да се врати и да нè касне“, рече Сендс.

Ситуацијата во Конго е покомплицирана од голем број други здравствени закани, вклучувајќи и појава на сипаници и хуманитарна криза, со 1,7 милион внатрешно раселени лица во провинцијата во која избувна епидемијата. Има околу 15.700 сомнителни случаи на сипаници, но реалната бројка е веројатно многу поголема.

За една од најсиромашните земји во светот, кризата бара финансиски одговор што таа не е во состојба да го обезбеди. Роџер Камба, министер за јавно здравство на Конго, проценува дека ќе бидат потребни 3,5 милиони дози по цена од стотици милиони долари.

Една од организациите одговорни за глобалните напори за вакцинација, „Гави“, почна да одржува дневни состаноци од мај наваму. До минатиот четврток Конго сè уште чекаше официјално да ги побара вакцините. Земјата нема итни вакцини против сипаници, но побарала дози од САД и Јапонија, изјави за „Блумберг“ Семјуел Боланд, менаџер за инциденти со мали сипаници за СЗО во Африка.

Координацијата ќе биде клучна за одговорот, рече главната извршна директорка на „Гави“, Санија Ништар. „Сите разговараме со исти донатори - и тоа е многу добра вест - но мора да се координираме и се надеваме дека ќе има механизам за координација во наредните денови“, рече таа.

Донациите на вакцини би можеле да дојдат од земји што веќе имаат резерви. САД планираат да донираат 50.000 дози, но имаат милиони повеќе. Обединетото Кралство потврди дека ќе презема акции, без да даде дополнителни детали. Германија има 117.000 дози.

„Тажната работа овде е што вакцините се подготвени за употреба и има одредени работи што ги спречуваат овие земји да пристапат до нив“, рече Хавиер Гузман, директор за глобална здравствена политика во Центарот за глобален развој. „Без брз одговор, болеста ќе се прошири во други земји“, рече тој.

По првичните донации, вакцините ќе треба да се нарачаат преку производители како „Баваријан Нордик“. Кога беше прогласена вонредната состојба, тие дискусии беа ограничени, изјави извршниот директор на данската компанија Пол Чаплин.

„Ковид, а исто така и епидемијата на сипаници во 2022-2023 година, требаше да ги научи сите дека не можете едноставно да игнорирате епидемија во еден дел од светот“, рече тој.

Во моментов нема коментари за веста. Биди прв да коментира...

Остави коментар