Неделата почна валкано. Со ѓубре по улиците и раскарани градоначалници – оние кои сами чистеа во неделата вечерта и немаше каде да го остават тоа што го собраа и градоначалничката на Скопје, Данела Арсовска која на крај пиша и казни од 140.000 евра за колегите кои го оставиле ѓубрето пред портите на депонијата „Дрисла“. До крајот на денот во понеделникот, кавгите продолжија, но ѓубрето почна да се расчистува.
Истиот ден Владата и синдикатот ја расчистија состојбата и со платите во јавниот сектор. Ќе добијат и покачување и К15 годинава и поголемо покачување во 2025 година. Буџетот за 10 години, само за платите за администрацијата, се зголемил за 183 милиони евра. Зголемувањето од 2025 ќе чини околу 100 милиони. Се отвора прашањето кога платите во јавниот сектор за помалку од две години ќе се зголемат за над 40 отсто, кој ќе сака да работи во првиоатниот, посебно што и сега има државни компании кои даваат три пати поголем износ за к15 од приватните.
Растот на платите бара итна реакција – ребаланс во септември, но пред тоа мора да се обезбедат пари. Има два извора. Едниот е задолжувањето преку граѓанските обврзници. Другиот е преку даноците. За да си ги скрати маките, Владата го повлече Предлог законот за данок на солидарност од Собрание, но пак го усвои со залепено европско знаменце за да не може повторно да заглави во собраниските фиоки. Сепак, опозицијата вели ќе најде инструменти за пак да го блокира. Градоначалникот пак на Аеродром, Тимчо Муцунски, од ВМРО ДПМНЕ се жали дека власта го блокира издавањето на зелена обврзница во општината. И кога сме кај блокадите, блокирани се и 113.000 фирми и граѓани само за три месеци годинава.
Високите цени односно инфлацијата е причина број еден за блокирањето сметки. Во САД пак таа падна на три отсто. Но, тоа не значи дека ФЕД ќе престане со затегнување на монетарната политика. Нивната цел е два отсто инфлација.
Неделава се оствари и најавата на Маск за создавање алтернатива за Чет ГПТ. Тој го претстави „Екс еј-ај“ (xAI). Сега милијардерот надгледува шест компании. И немојте да мислите дека му е лесно, за да ја издржи трката во технолошкиот сектор зема кетамин. Всушност, ништо чудно. Силициумската долина, велат, е навлечена на дроги.
Анализиравме и дали ќе има богати Македонци со акции кај технолошките гиганти. Анализата покажа дека во услови кога на Македонската берза тргувањето е вредно само за заборав, граѓаните вложиле близу 700 милиони евра во странски хартии од вредност. Аналитичарите на „Блумберг Адрија“ пак со своја препорака за вложување пари - индината на инвестирањето е во ексчејнџ-трејдед фондовите.
За крај препорака од лекарите, денеска температурата ќе надмине 40 степени, пијте вода и не излегувајте на сонце. Ова е првиот топлотен бран годинава, а летото само што почна.
.webp){kind=icon}
