.webp){kind=icon}
В понеделник е денот Д, кога ќе се знае дали и колку ќе бидат покачени платите на работниците во јавниот сектор и администрацијата. Копјата се кршат не само околу износот што треба да легне на сметките на вработените туку и за оној дел од 78 отсто за кој синдикатот бара да биде симнат од контата на 1.060 функционери. Овој непристоен предлог од Сојузот на синдикатите на Македонија (ССМ) има цел да го намали товарот врз буџетот.
Извори од преговарачките тимови, за „Блумберг Адрија“ велат дека меѓу претставниците на власта има такви што сакаат да се откажат од големото зголемување на платата, но има и такви што не сакаат да им се чепне во новата плата.
Ние во „Блумберг Адрија“ не успеавме да дознаеме кој би се откажал од 78 отсто поголема плата, но претпоставуваме дека тоа не е вицепремиерот Фатмир Битиќи, затоа што тој неделава докажа дека има вештини што можат да му обезбедуваат повисоки приходи. Се понуди да оди на испомош во ЕВН и да ги штелува броилата за сите домаќинства од 1 декември да имаат поевтина струја прекуден. Да беа сите во администрацијата толку кооперативни, немаше да имаме само најави за ветерници, ќе имавме и повеќе турбини и повеќе поевтина струја од ветер.
Освен вработените во јавниот сектор, и компаниите се во потрага по финансии. Тие велат дека најголем проблем им е ликвидноста. Дополнителен товар им прават најавите дека е можно законот за солидарен данок да биде изгласан со европско знаменце, што значи дека опозицијата нема да го блокира и ќе мора да го платат. Сето ова остава впечаток дека земјава се бори со уште една тешка година, а за милијардерите што се опфатени со индексот на милијардери на „Блумберг“ првата половина од 2023 година е една од најдобрите. Дневно во просек се побогати за 14 милиони долари.
Сепак, можеби и има надеж за домашните компании дека состојбата ќе се подобри. Првпат по една година податоците на статистика покажаа поголем раст на индустриското производство. Уписите во средните училишта, пак, покажаа дека еден од најголемите проблеми на работодавците, недостигот од работници, можеби и ќе се намали затоа што најголем дел од завршените основци реши да се запише во средно стручно училиште. Статистиката покажува дека во стручните училишта учат повеќе машки деца, на факултет женски. Тоа значи дека се отвора простор за жените да заземат повеќе менаџерски позиции, па индексот на родова еднаквост да се зголеми.
Неделава што изминува се занимаваме со цените на недвижностите. Иако тие забавуваат, земјава е лидер во Европа по поскапувањето на квадратен метар. Прогнозите за идните случувања во овој сектор се различни. Градежниците велат нема услови за поголемо намалување, експертите велат има, затоа што како што расте економската несигурност, така ќе се намалува кредитирањето. Ова второво некако повеќе има логика, со оглед на тоа дека податоците на НБРМ покажуваат оти над 50 отсто од станбените кредити во земјава ги отплаќаат лица со плати од над 50.000 денари. А такви, за жал, немаме многу, затоа се преговара за платите.
