Замолкнавме од тага и од бес. Шеесет животи одзеде пожарот во Кочани, 59 во дискотеката и Иле, возачот на кочанската брза помош, чие срце пукна по тоа што го гледаше цел ден. За огнот не е крива пиротехниката, туку неодговорноста и корумпираноста.
Неделава зборуваа само политичарите, информираа за текот на акцијата во која бројот на приведени секојдневно расте. Зборуваа за мерките што ги преземаат за да не се повтори ова. Кажаа дека дискотеката „Пулс“ била штала, а сликите од шталата, резилот наш, ги виде цел свет. И студентите сакаа да молчат, ама на нивниот собир дојде министерката за да зборува.
Повредени се над 170 лица, а над 100 се лекуваат во странство. Благодарност за соседните земји и за земјите од ЕУ што помогнаа преку Европскиот механизам за цивилна заштита. Благодарност и до сите нашинци што навреме се евакуираа од земјава и сега нудат сместување за семејствата на повредените додека трае лекувањето. Тоа е тоа што го знаеме за трагедијата.
Она што не го знаеме е следното: ако за три дена успеаја да откријат толку неправилности, што работеа истите инспектори минатиот петок или минатата недела или месец, година? Зошто Пловдив, Варна и Ниш имаат центри за третман на настрадани во пожари, а Скопје нема? Образложението на властите дека е неисплатливо ми звучи исто како објаснувањето на земјоделците кога ги прашувате зошто не се осигуруваат. Велат можеби ќе биде добра година, џабе ќе ги дадеме парите. Одамна немало добра година.
Прочитајте повеќе:
Рангирање: Финците се најсреќни луѓе во светот, Македонците се најнесреќни во регионот
Политичарот Илон го уништува бизнисменот Маск
Глобално, тема на неделата е двочасовниот разговор меѓу Трамп и Путин. Рускиот претседател се обврза да ги ограничи нападите врз украинските енергетски капацитети, но одби да се согласи на поширок 30-дневен прекин на огнот како што бараа САД.
Фед ги остави каматните стапки во САД непроменети, што е во согласност со очекувањата на сите, освен на претседателот Трамп, кој смета дека каматите треба да паднат додека расте притисокот од царините.
Царините остануваат во фокусот. Тие се причина за новите рекордни нивоа на цените на златото, но и за преселбата на златните прачки од Лондон во Њујорк.
Намерата на САД да ги преобликуваат трговските односи предизвика и корекција на пазарите на капитал, па анализиравме кој купува најмногу во време на корекција.
Прочитајте повеќе:
Флексибилно работно време и работа оддома - лекови и за продуктивноста и за животниот баланс
Македонки сведочат како е да се промени професијата
И неделава го анализиравме пазарот на недвижности во земјава. Овој пат пишувавме за кириите и колку се заработува од нив. Податоците покажаа дека Скопје е европски вицешампион, приносите од издавање стан се повисоки само во Белград.
Прочитајте повеќе:
Трговска војна: Се отвора Пандорината кутија, Македонија ќе биде колатерална жртва
ББА-анализа: Регионот Адрија продолжува да расте силно и покрај ризиците
Парите никогаш не се доста, како во животот, така и во спортот. Нов начин за поголем прилив на средства фудбалските клубови гледаат во стадионите. Никнуваат ултрамодерни арени, а целиот сектор доживува градежна ренесанса. Парите никогаш не им се доста ниту на тенисерите, а борбата за нивните права ја предводи Новак Ѓоковиќ.
.webp){kind=icon}
Во моментов нема коментари за веста. Биди прв да коментира...