Фед пред одлука за каматните стапки - аналитичарите не очекуваат промена

Претставниците на Федералните резерви (Фед) на денешниот состанок веројатно ќе одлучат да ги задржат каматните стапки на истото ниво, купувајќи со тоа време да проценат како политиките на претседателот Доналд Трамп ќе влијаат врз економијата, која се соочува и со долготрајни инфлациски притисоци и со зголемени грижи за растот.

Новите царини од администрацијата на Трамп, заедно со одмаздничките акции од американските трговски партнери, го нарушија расположението на потрошувачите и ги разгореа очекувањата на Американците за идната инфлација. А со тоа што некои давачки се одложуваат брзо по објавувањето, не е јасно како трговската војна на крајот ќе ја обликува економијата.

Bloomberg Mercury

 

„Мислам дека ќе има доста широка дисперзија на траекторијата за намалување на стапките поради неизвесноста“, рече Дајан Свонк, главен економист во КПМГ (KPMG).

Одлуката на Фед за каматите, заедно со ажурираните квартални економски прогнози на официјалните лица, ќе биде објавена вечер по локално време, по што претседателот на Фед, Џером Пауел, ќе одржи прес-конференција.

Изјава

Се очекува официјалните лица да ја задржат референтна каматна стапка во опсег од 4,25 до 4,5 проценти, но набљудувачите на Фед велат дека изјавата по состанокот може малку да се промени поради неодамнешните податоци што укажуваат на побавна активност.

Спомнувањето на неизвесната перспектива и избалансираните ризици за вработување, како и инфлацијата, веројатно ќе останат непроменети, велат економистите, но креаторите на политиката може да го отфрлат описот на „солидно темпо“ на економски раст.

Ажурирани проекции

Економската слика еволуира откако официјалните лица последен пат ги доставија своите проекции за каматните стапки во декември. Заканите за царини ескалираа, свежите податоци - вклучувајќи го и влошувањето на расположението на потрошувачите - предизвикаа загриженост за изгледите за раст, а цените на акциите нагло се намалија во последниве недели.

Повеќе креатори на политики би можеле да сигнализираат дека претпочитаат да се одржат стапките стабилни, што е „природен исход“, со оглед на несигурноста на многу од политиките на Трамп, особено околу трговијата, смета Свонк. „Дали имаме трговска војна што е толку лоша што предизвикува многу подлабока рецесија? Не знаеме“.

Во декемврискиот извештај за економските проекции претставниците на Фед наведоа две намалувања на каматните стапки за годинава, според просечната процена. И економистите генерално очекуваат дека централната банка ќе продолжи да сигнализира за две намалувања во 2025 година.

Bloomberg Mercury

 

Многу од аналитичарите што ги следат активностите на Фед очекуваат ажурираните прогнози да покажат дека официјалните лица ги намалиле нивните процени за растот годинава, а ги зголемиле проекциите за клучниот мерач на инфлацијата во споредба со декември. Некои исто така очекуваат официјалните лица да ги зголемат проекциите за невработеноста.

„Тоа што ќе се одрази во прогнозата ќе биде сценарио за стагфлација. Прашањето е колку долго ќе трае“, рече Гунеет Дингра, раководител за стратегија на американските каматни стапки во „БНП Парибас“ (BNP Paribas). „Мојата загриженост е дека Фед повторно ќе покаже дека е повеќе фокусиран на делот за инфлација или барем повеќе отколку на пазарот, а тоа има големи шанси да ги изненади“ инвеститорите.

Што велат аналитичарите на „Блумберг“?

„Би можеле да видиме повеќе функционери што предвидуваат помалку намалувања на каматните стапки годинава: гледаме блиска врска меѓу едно или две намалувања од 25 базични поени. Дури и во тој случај, претседателот на Фед, Џером Пауел, ќе се обиде да остане аполитичен на прес-конференцијата, кога се очекува да каже дека прогнозите ја вклучуваат севкупната политика на Трамп. Гледаме ризик дека Фед ќе задоцни со намалување на каматите ако дојде до пад“, велат Ана Вонг, Стјуарт Пол, Елиза Вингер, Естел Оу и Крис Колинс, аналитичари од „Блумберг економикс“ (Bloomberg Economics).

Фед традиционално може да одговори на забавувањето на растот со намалување на каматните стапки за да ја зајакне економијата. Но, со оглед на тоа што инфлацијата сè уште е над целта на централната банка од два отсто, некои економисти се прашуваат дали креаторите на политиката би ги задржале високите стапки и покрај слабеењето на економијата во обид да продолжат да го ладат растот на цените.

„Пазарот бара побрзи и повеќе намалувања на стапките бидејќи инвеститорите се загрижени поради можни импликации на растот“, рече Кети Бостјанчиќ, главна економистка во „Нејшнвајд“ (Nationwide). „Можно е, но мислам дека Фед воопшто не е подготвен да почне да го сигнализира тоа“.

Прес-конференција

Прес-конференцијата на Пауел ќе биде во фокусот на инвеститорите, кои бараат уверување дека Фед ќе биде подготвен да ја поддржи економијата доколку е потребно.

Џером Пауел, претседател на Фед Bloomberg Mercury

 

Шефот на Фед постојано истакнува дека нема потреба да се „брза“ со намалување на стапките додека економијата останува „на добро место“. Тој веројатно ќе потврди дека монетарната политика е добро позиционирана, овозможувајќи им на креаторите на политиката да чекаат појасни сигнали за слабеење на пазарот на труд или зголемување на инфлацијата.

Веројатно ќе биде побарано од Пауел да разјасни дали тој и неговите колеги ги гледаат царините како еднократен или постојан двигател на инфлацијата. Тој исто така веројатно ќе добие прашања за падот на приносите на обврзниците и цените на акциите, кои забележаа корекција кога индексот S&P 500 падна за 10 проценти.

Аналитичарите ќе ја следат и неговата процена за влошувањето на расположението на потрошувачите и зголемените инфлациски очекувања. Внимателно следеното мерило за долгорочните очекувања за цените се искачи во март трет месец по ред, на највисоко ниво за повеќе од три децении. Досега централните банкари велеа дека долгорочните процени за инфлацијата остануваат добро закотвени.

Биланс на состојба

Банката на федерални резерви наскоро би можела да го забави темпото со кое дозволува да созреваат средства надвор од билансот на состојбата - процес познат како квантитативно затегнување - или целосно да го паузира поради загриженоста дека неизвесноста околу плафонот на долгот може да предизвика потрес на пазарот на обврзници.

Голем број економисти и аналитичари очекуваат најава за промени во билансната политика во следните неколку месеци, и тоа можеби уште во текот на неделава.

 

Во моментов нема коментари за веста. Биди прв да коментира...

Остави коментар