Инфлацијата во САД падна на 3 отсто, точка на пресврт за ФЕД

Стапката на инфлација во САД падна на најниско ниво во повеќе од две години, што е голем чекор кон ставање крај на вонредната состојба кај трошоците на животот - а можеби и на историското монетарно затегнување од страна Федералните резерви.

Со стапка од три проценти минатиот месец, инфлацијата на потрошувачките цени сега е само една третина од нивото кое го достигна пред една година, што беше највисоко во последните четири децении. И деталите за јуни беа исто така подобри од очекуваното, при што клучните показатели за базичната инфлација беа под прогнозите.

Тоа доаѓа по период од околу две години, кога големата дебата за инфлација ги зафати насловите и ја имаше насекаде, од претседателската политика на САД до разговорите во кафеаните.

Ништо од ова не значи дека играта е завршена во борбата против ценовните притисоци - особено за Банката на федералните резерви, за која се смета дека е ќе оди кон уште едно зголемување на каматните стапки подоцна овој месец. Сепак, никогаш не биле поголеми очекувањата дека покачувањето на 26 јули, кое би ја однело референтната стапка во САД на 5,5 проценти ќе биде последно.

На тоа вчера се обложуваа пазарите откако излегоа податоците за инфлацијата. Приносите на краткорочните благајнички записи паднаа, акциите пораснаа, а доларот се упати на најниско ниво за повеќе од една година - сето тоа во очекување дека ФЕД може да олабави наместо да затегнува.

„Се гледа крајот“

„Новите податоци би можеле да ѝ дадат на ФЕД причина да дебатира дали се потребни дополнителни зголемувања на каматните стапки по овој месец“, напиша Рајан Свит, главен американски економист во „Оксфорд економикс“. „Овој циклус на затегнување од страна на ФЕД најверојатно ќе заврши“.

 

 

Сепак, инфлацијата останува далеку над целта на ФЕД од два проценти, а последната фаза на нејзино намалување може да испадне најтешка.

Уште повеќе, Американците сè уште плаќаат многу повеќе отколку пред пандемијата за низа стоки и услуги - и не се предвидува таа болка да заврши наскоро. Претседателот Џо Бајден, подготвувајќи се за битка за реизбор следната година, најверојатно ќе открие дека високите цени остануваат оружје што неговите републикански ривали можат да го користат против него.

За ФЕД, сè уште има причини за загриженост. Како прво, додека инфлацијата се движи во вистинската насока, математиката направи најновите бројки да изгледаат подобро отколку што навистина се.

Познати како „базни ефекти“, споредбата на индексот на потрошувачките цени со јуни 2022 година - кога руската инвазија на Украина штотуку доведе до брз пораст на цените на енергијата - направи забавувањето да изгледа особено драматично. Всушност, годишниот раст на цените би можел малку да се зголеми во наредните месеци бидејќи споредбите со минатата година стануваат понеповолни.

„Премногу брзо враќање“

Една објава за индексот на потрошувачки цени, дури и ако е подобра од очекувањата, веројатно нема да има големо влијание кај претставниците на ФЕД. Говорејќи по објавувањето на најновите бројки, претседателот на Ричмонд ФЕД, Томас Баркин, ја повтори посветеноста на централната банка за враќање на стабилноста на цените.

„Инфлацијата е превисока. Нашата цел е два проценти, рече вчера Баркин. „Ако се повлечете прерано, инфлацијата ќе се врати силна, што потоа ќе бара ФЕД да направи уште повеќе“.

Голем дел од она што ја одржува инфлацијата покачена - како и напојување на остатокот од економијата - е еластичниот пазар на труд. Работодавците продолжуваат да отвораат работни места со силно темпо и зголемувањето на платите е сè уште силно, што им овозможува на Американците да продолжат да трошат.

Трошоците за домување придонеле за над 70 проценти од растот на цените во јуни, додека цените на билетите за авиокомпании и користени автомобили се намалиле. Цените на намирниците, кои беа клучен извор на финансиски оптоварувања за американските семејства се непроменети во однос на еден месец претходно.

Внимателно следениот показател за цените на услугите, кој ги исклучува енергијата и домувањето, беше малку променета во јуни во однос на претходниот месец.

Џенифер Ли, виш економист во BMO Capital Markets вели дека „се‘ на се‘, новите податоци создаваат простор за дишење за ФЕД“.

Под претпоставка дека извештаи за инфлацијата од сега до септември ќе покажат сличен тренд, вели таа, „ова дефинитивно им дава оправдување да останат на страна“.

Во моментов нема коментари за веста. Биди прв да коментира...

Остави коментар