Мелони: Новиот данок е резултат на лошото постапување на италијанските банки

Италијанската премиерка Џорџа Мелони ја поддржа одлуката на нејзината влада да донесе данок за 40 отсто на екстра-профитот на банките, прекинувајќи го дводневниот молк по потегот што ја збриша почетната пазарна вредност од 10 милијарди долари и предизвика нејзината коалиција жестоко да се бори за да ги смири инвеститорите.

Мелони застана цврсто зад ставот дека данокот е „најважната“ мерка одобрена од нејзиниот кабинет доцна во понеделникот. Таа рече дека приходите што банките ги заработуваат поради зголемувањето на европските каматни стапки се „нефер маржи“, во видеопорака објавена во средата на Фејсбук.

„Данокот е последица на лошото однесување на заемодавците што имаат корист од повисоките каматни стапки, а притоа не им помагаат на клиентите“, наведе Мелони.

Ненадејното објавување на новата мерка од страна на вицепремиерот Матео Салвини доведе до пропаст на пазарот. Акциите делумно закрепнаа откако владата појасни дека ќе преземе чекори за да го ограничи влијанието за многу заемодавци.

Мелони исто така ја нападна Европската централна банка велејќи дека „ефикасноста“ на зголемувањето на стапките „е сомнителна“.

Владата постојано ја напаѓа ЕЦБ поради зголемувањето на стапките и штетното влијание за економијата, а вицепремиерот Антонио Тајани претходно неделава изјави дека новиот данок е „неизбежна последица“ од зголемувањето на стапките на ЕЦБ.

Надоместокот, за кој Салвини рече дека во буџетот ќе донесе неколку милијарди евра, ќе ѝ помогне на владата да ги финансира изборните ветувања за нејзината популистичка база, вклучувајќи и намалување на даноците и поддршка за хипотеки за сопствениците што по првпат купуваат недвижен имот. Сепак, овој потег бара одобрение од парламентот и може да се промени. Тој исто така може да биде оспорен пред судовите, како што се случи со слична мерка во Шпанија.

Во моментов нема коментари за веста. Биди прв да коментира...

Остави коментар