.webp){kind=icon}
Јапонскиот премиер Фумио Кишида и кинескиот претседател Шји Џјинпинг се согласиле преку дијалог да бараат решение за спорот околу испуштањето на пречистената отпадна вода од нуклеарната централа Фукушима, изјави Кишида за новинарите.
„Повикав на мирно решение на овој проблем, на научна основа“, рече Кишида по средбата со Шји за првпат по една година. „Ќе одржиме научни дискусии за тоа прашање“, додаде тој.
Состанокот во четвртокот во Сан Франциско доаѓа еден ден откако Џо Бајден го поздрави подобрувањето на односите на САД со Кина по разговорите со Шји. Тој потопол тон помогна да се отвори патот за сојузникот на САД, Јапонија, да ги зајакне врските со својот најголем трговски партнер.
Има бројни несогласувања меѓу азиските соседи, од прашањата за полупроводници до нуклеарниот отпад и судбината на јапонските граѓани приведени во Кина. Продолжува и територијалниот спор околу ненаселените острови во близина на Тајван.
Кишида рече дека го повикал Шји да ја укине забраната за увоз на јапонски морски плодови, што Кина ја воведе како одговор на испуштањето отпадна вода во океанот од нуклеарната централа Фукушима. Меѓународната агенција за нуклеарна енергија соопшти дека испуштањето на прочистените отпадни води не претставува еколошки ризик.
Проблемот со отпадните води ја загрози продажбата на јапонските компании во Кина, вклучувајќи го и производителот на козметика „Шисеидо“ (Shiseido Co.), кој минатата недела ја намали прогнозата за профит. Тоа, исто така, предизвика влошување на односот на јапонската јавност кон Кина, кој стана најнегативен од 2014 година, според истражување објавено минатиот месец.
Шји на почетокот на состанокот му рекол на Кишида дека двете земји треба да се фокусираат на заедничките интереси, соодветно да ги решат разликите и да воспостават односи засновани на стратешки реципроцитет, објави државната кинеска централна телевизија.
„Сакам да работам со вас за да создадеме посветла иднина во односите меѓу Јапонија и Кина за доброто на следната генерација“, одговори Кишида.
За време на состанокот, Кишида изрази загриженост за ситуацијата во Источното Кинеско Море, каде што бродови од двете земји патролираат во водите околу архипелагот на ненаселени острови за кои претендираат и Кина и Јапонија. Јапонскиот премиер, исто така, го повика Шји да го повлече присуството во она што Јапонија го гледа како своја ексклузивна економска зона.
Минатата година од Токио беше објавено дека Кина претставува „безбедносен предизвик“ и дека Јапонија планира најголемо зајакнување на своите воени капацитети од Втората светска војна, а овој став го вознемири Пекинг.
Оттогаш, Јапонија, исто така, се соочува со обвинувања од Кина поради следењето на чекорите на САД за заострување на контролата за извоз на чипови во Кина. Јапонија и Кина на разговори оваа недела се договорија да воспостават дијалог за контрола на извозот, соопшти кинеското Министерство за трговија.
