Рускиот претседател Владимир Путин планира да ја посети Кина нешто повеќе од една недела по почетокот на неговиот нов мандат, дознава „Блумберг“ (Bloomberg).
Посетата е закажана за 15-16 мај, изјави лице запознаено со плановите на Кремљ. Датумите може малку да се променат, но дури и да се променат, патувањето за разговори со кинескиот претседател Шји Џјинпинг ќе биде прво патување на Путин во странство од неговата инаугурација во Кремљ на 7 мај, додаде изворот, кој побара да остане анонимен, бидејќи информациите сè уште не се јавни.
Путин минатиот месец изјави дека планира да ја посети Кина во мај, иако не ги прецизираше точните датуми.
Прочитај повеќе
![„Хуавеј“ со новите чипови го стигнува „Епл“ на кинескиот пазар](/data/images/2024-04-26/59739_410804649_kf.jpg)
„Хуавеј“ со новите чипови го стигнува „Епл“ на кинескиот пазар
Најновите паметни телефони на „Хуавеј“ имаат надградена верзија на процесори произведени во Кина.
26.04.2024
![Русија и Кина воопшто не го користат доларот во размената, вели Лавров](/data/images/2023-11-30/48396_lavrov-sda_kf.jpg)
Русија и Кина воопшто не го користат доларот во размената, вели Лавров
Повеќе од 90 отсто од порамнувањата се вршат во националните валути на двете земји, рече Лавров.
22.04.2024
![Кинескиот претседател во мај ќе ја посети Србија](/data/images/2023-12-27/50445_4058433741_kf.jpg)
Кинескиот претседател во мај ќе ја посети Србија
Кинескиот претседател Шји Џјинпинг од 5 до 10 мај ќе ги посети Франција, Србија и Унгарија.
29.04.2024
Времето на посетата ќе биде јавно објавено во догледно време, изјави портпаролот на Кремљ, Дмитриј Песков, одговарајќи на прашањето на „Блумберг“. Министерството за надворешни работи во Пекинг не одговори веднаш на барањето за коментар.
Путин ќе пристигне во Кина откако Шји ќе ја заврши својата прва посета на Европската унија по пет години. Тој треба да отпатува во Србија, Франција и Унгарија на турнеја која започнува на 5 мај, а меѓу темите за разговор најверојатно ќе биде и војната во Украина.
Иако Кина отворено не ја поддржа инвазијата на Кремљ врз Украина, Москва и Пекинг прогласија пријателство „без граници“ што досега ѝ помогна на Русија да ги надмине санкциите наметнати од САД и нивните сојузници. Поттикната од продажбата на руска нафта и купувањето на електроника, индустриска опрема и автомобили, трговијата на Москва со Кина достигна рекордни 240 милијарди долари во 2023 година, што е над двојно повеќе од 108 милијарди долари постигнати во 2020 година.
И покрај зајакнувањето на економските врски, кинескиот извоз во Русија падна за речиси 16 отсто во март во споредба со една година порано, според официјалните податоци. Путин може да ја истакне потребата од зголемување на трговијата меѓу двете земји за време на неговите разговори со Шји, рече во април лице запознаено со ова прашање. Во меѓувреме, кинеските државни банки ги зајакнаа ограничувањата за финансирање на руски клиенти откако САД одобрија нови санкции, изјавија извори за „Блумберг“ во јануари.
Путин последен пат ја посети Кина во октомври за да присуствува на форумот за иницијативата „Појас и пат“, ретко патување во странство за рускиот лидер откако Меѓународниот кривичен суд издаде налог за негово апсење за наводни воени злосторства, во март минатата година.
Путин на претседателските избори во март го продолжи своето речиси четвртвековно владеење со Русија за уште шест години, освојувајќи рекордни 87 отсто од гласовите на изборите на кои не се соочи со сериозна конкуренција.