.webp){kind=icon}
Внимателно го следиме процесот, Министерството не е истражен орган, но ќе се заложиме за тоа никој да не биде обвинуван во државата без да има соодветни докази за тоа, изјави министерот за дигитална трансформација Стефан Андоновски во врска со обвинувањата од Венецуела дека „хакери од Северна Македонија“ направиле сајбер-напад врз системот за пренос на податоци на изборите во оваа јужноамериканска земја.
Прашан за коментар во врска со обвинувањето од главниот обвинител на Венецуела дека наши државјани извршиле сајбер-напад во корист на опозицијата, а против досегашниот претседател Николас Мадуро, Андоновски одговори дека „станува збор за социјалистички режим што со години често лиферува информации непоткрепени со докази и обвинува засегнати страни и држави што немаат одговорност во таквите случаи“.
Прочитајте повеќе: Венецуела: Сајбер-напад извршен од Македонија влијаел врз претседателските избори
„Се надевам дека освен коментарите што излегоа во јавноста и кои ги забележавме и со внимание ги следиме, од државата, од властите во таа држава ќе има и соодветни докази за наводно вмешување на некои наши граѓани или институции од државата. Внимателно го следиме процесот. Министерството не е истражен орган, но ќе се заложиме за тоа никој да не биде обвинуван во државата без да има соодветни докази за тоа и да не бидеме вмешувани во внатрешнополитички битки на еден авторитарен режим што постои со години во таа држава и неговиот однос кон опозицијата во таа држава“, рече Андоновски, одговарајќи на новинарски прашања по состанокот со работната група за изработка на сајбер-стратегија.
Изборната власт во Венецуела соопшти дека Мадуро победил на претседателските изборите во неделата со 51,2 отсто од гласовите, наспроти 44,2 отсто од гласовите што го фаворизирале неговиот противкандидат Едмундо Гонзалес. Опозицијата ги отфрли резултатите и рече дека неколку неофицијални извештаи покажуваат дека Гонзалес победил со 70 отсто од гласовите.
Тоа што по оваа вест граѓаните почнаа да излегуваат на улиците не е изненадување. Истражување на почетокот на јули од страна на фирмата „Делфос“ со седиште во Каракас покажа дека речиси 40 отсто од Венецуелците веруваат дека доколку има измама, треба да протестираат додека владата не ги признае вистинските резултати од изборите.
Главниот обвинител Тарек Вилијам Сааб претходно кажа дека целта на наводниот хакерски напад била „забавување“ во системот за пренос на податоци и за објавување на резултатите од претседателските избори, но, како што рече, „за среќа, акцијата била запрена и избегната“.
