Министерот за економија Бесар Дурмиши изјави дека во буџетот се предвидени пари за зголемување на минималната плата, но дека треба да се разговара со сите засегнати страни за тоа колкаво би било зголемувањето.
Тој најави дека на оваа тема ќе се разговара во првата недела од декември, кога ќе се одржи Економско-социјалниот совет. Минималната плата во моментов е околу 370 евра.
„Јас сакам минималната плата да биде и 600 евра. Реално да кажеме, барањето е 450, јас сакам да биде 600 евра. Но да ги видиме сите засегнати страни, да се отвори темата во првите денови на декември. Ќе ги чуеме сите страни, ќе ги видиме и можностите на Владата дали се предвидени толку средства и дали има можност. Ќе ги видиме и барањата на работодавците, оти и тие се засегнати страни од ова барање, и на крајот ќе донесеме заедничка одлука“, истакна Дурмиши.
МИА
Според Дурмиши, предвидени се средства за зголемување на минималната плата за околу 2.000 денари, што е во согласност со законското решение според кое во март минималната плата би се зголемила од 1.600 до 1.800 денари.
Ваквото зголемување, според претседателот на Сојузот на синдикати на Македонија, Слободан Трендафилов, не е доволно за преживување, а зголемувањето на минималната плата нема да биде преголем товар за државниот буџет со оглед на тоа дека околу 35.000 работници земаат плата во износ на минималната или под минималната плата.
„Според последните податоци, во Македонија 25.000 работници примаат плата во висина на минималната плата, а 10.000 работници примаат плата од еден до 22.000 денари, но она што е поразително е што сите овие работници примаат плата во плик, за што не се плаќаат придонеси од задолжителното социјално осигурување и тоа ја чини државата на годишно ниво околу 250 илјади евра, односно неуплатени придонеси во Фондот“, изјави Трендафилов, кој смета дека во однос на минималната плата аргументите се на страната на синдикатите.
.webp){kind=icon}