Синдикатот на „Самсунг“ го најави првиот штрајк во историјата на компанијата

Синдикатот на „Самсунг“ (Samsung Electronics Co.) го најави својот прв штрајк, дополнително комплицирајќи ја ситуацијата во најголемата јужнокорејска компанија, која се обидува да закрепне од проблемите во својата индустрија.

Националниот синдикат на „Самсунг“, најголемиот синдикат на технолошкиот гигант со околу 28.000 работници, ја објави одлуката во средата откако беа запрени преговорите за платите со раководството. Двете страни беа во преговори од почетокот на годинава, но не успеаја да постигнат договор.

„Не сакаме зголемување на платата од еден до два отсто. Сакаме да бидеме праведно платени за сработеното“, изјавија од синдикатот пред канцелариите на „Самсунг“ во Сеул. „Сакаме да бидеме фер и транспарентно платени за нашата работа“.

Одлуката на синдикатот доаѓа откако „Самсунг“, под раководство на главниот извршен директор Џеј И. Ли, се најде во невообичаена позиција да се обидува да го достигне локалниот ривал „СК Хајникс“ (SK Hynix Inc.) во клучниот сектор за чипови. „СК Хајникс“ веќе зазеде водечка позиција во сегментот на мемориски чипови што се користат за развој на услуги со вештачка интелигенција.

Акциите на „Самсунг“ паднаа за 3,1 отсто по најавата за штрајк, со што нивната загуба надмина 10 отсто од највисокото ниво во април.

„Компанијата останува посветена на водење преговори со синдикатите и прави сè што може за да постигне договор со нив“, се наведува во соопштението на „Самсунг“.

Не е јасно како потезите на синдикатот ќе влијаат на работењето на компанијата. Некои од синдикалците планираат да не одат на работа на 7 јуни. Лидерите на синдикатот тврдат дека интерно го процениле бројот на работници што ќе штрајкуваат, но одбија да дадат точен број.

Синдикалците планираат и последователно продолжување на штрајкот доколку раководството одбие да учествува во натамошни преговори, но не го открија точниот датум.

Првиот ден од штрајкот е петок, меѓу четвртокот, кој е празник, и викендот, па отсуството од работа ќе им овозможи на работниците да го продолжат својот одмор. Лидерите на синдикатот не очекуваат значително влијание врз производството на чипови и други електронски уреди бидејќи голем дел од работењето е автоматизиран, а „Самсунг“ има голема работна сила.

Синдикатот сака врвниот менаџмент, вклучувајќи го и Ли, посериозно да ги сфати нивните ставови. Наследникот на семејството што ја основа компанијата вети дека во 2020 година ќе ја прекине практиката на сузбивање на организираните работнички активности.

„И покрај ветувањето на претседателот Џеј И. Ли дека несиндикалното раководство ќе се повлече, ставот на целото раководство не е променет“, велат од синдикатот. „Не можеме повеќе да го толерираме немањето волја на компанијата за преговори“.

Сон Ву-мок, шеф на синдикатот, рече дека едно од клучните прашања во преговорите е исплатата на бонуси. Во март советот за работни и правни односи на „Самсунг“ одлучи да ги зголеми платите за годинава за 5,1 отсто.

Во последниве месеци Јужна Кореја работи на ограничување на инфлацијата, како и многу други земји. Корејската инфлација забави повеќе од очекуваното во април, при што потрошувачките цени се зголемија за 2,9 отсто.

Синдикалците предизвикаа негодување во јавноста откако минатата недела во Сеул одржаа митинг сличен на концерт со познати личности. „Самсунг“ не се соочил со работнички штрајк од своето основање во 1969 година.