Македонија сė повеќе извезува земјоделски производи, ама и играчки - пет вести на денот

Американскиот претседател Доналд Трамп најави дека официјално ќе ја означи Саудиска Арабија како главен сојузник на САД што не е член на НАТО, со што дополнително ги зајакна односите меѓу двете земји, по денот поминат во преговори со саудискиот престолонаследник Мохамед бин Салман.

Овој статус, кој им се доделува на држави со блиски стратешки односи со САД, овозможува финансирање и приоритетен пристап при купување одредена воена опрема, како и учество во заеднички истражувачки проекти. Саудиска Арабија ќе стане 20-от сојузник со овој статус, придружувајќи им се на другите земји во регионот, вклучувајќи ги Египет, Израел и Катар.

Македонско мени ама со месо од Бразил, сирење од Германија, грав од Киргистан...

Нашите предци веројатно никогаш не би помислиле дека нивните поколенија наместо тетовски ќе јадат грав од Киргистан, наместо галичко ќе јадат сирење од Германија, а уште помалку дека месо ќе увезуваме дури од Бразил.

Иако Македонија се‘ уште важи за земја на вкусната храна лесно може да го загуби овој атрибут со оглед на тоа што паѓа домашното земјоделско производство, а и тоа што се произведува во земјава се извезува односно завршува на трпезите во странство. Од друга страна во македонските маркети и на пазарите се зголемува присуството и продажбата на увезена храна. Читајте ја нашата анализа.

Патот на македонските играчки од Крива Паланка до големите трговски синџири низ светот

Играчките се радост и среќа за секое дете, но и за една успешна извозна компанија од Македонија. Станува збор за „Дема стил“, семејна компанија што започнала со работа во 1991 година и веќе 35 години произведува и извезува детски играчки од рециклирана пластика во многу земји низ светот.

Тие започнале со една машина и производство на детски топки, а денес фабриката располага со над 50 машини, со кои се произведуваат над 500 различни производи. Во асортиманот на производи на „Дема стил“ преовладуваат играчките, кои инаку имаат удел од околу 80 проценти во вкупната продажба што ја остварува компанијата, а речиси сето производство е наменето за извоз.

Кој ја уби европската автомобилска индустрија?

Документарниот филм „Кој го уби електричниот автомобил?“ (Who Killed the Electric Car?) од 2006 година анализираше зошто не се случи електричната револуција што ја најави првиот сериски електричен автомобил, ЕВ1 (EV1), кон крајот на деведесеттите. Во многу нешта, тоа навистина беше приказна за „убиство“, токму како што сугерира и самиот наслов. Одговорот што го понудија авторите беше јасен: убијците беа самите автомобилски компании.

Но, речиси дваесет години подоцна, би можел да се сними филм со исто толку заговорнички тон, само со обратни улоги и нов наслов: „Кој ја уби автомобилската индустрија?“ (Who Killed the Car Industry?) Во таа верзија, ќе се работи за наизглед самоубиствен чин, бидејќи одговорот би бил – електричниот автомобил. Сепак, како и секогаш во животот, работите се многу посложени.

На КОП30 расте притисокот за конечен договор за напуштање на фосилните горива

Десетици земји бараат од КОП30 (COP30) како свој главен резултат да донесе јасен план за напуштање на фосилните горива, што го отворa патот кон забрзани последни денови на преговорите.

Во преполната сала на состанокот на Обединетите нации во вторникот, претставници на Маршалските Острови, Колумбија, Обединетото Кралство, Германија, Кенија и Сиера Леоне ја предводеа групата од дваесетина земји што повикуваат на конкретен пат кон постепено откажување од нафта, гас и јаглен. Организаторите на иницијативата тврдат дека повеќе од 80 земји стојат зад тоа барање. Ова е досега најорганизираниот обид да се исполни ветувањето дадено пред две години на КОП28 во Дубаи – дека светот ќе започне да се оддалечува од фосилните горива. 

Германија се подготвува за војни во вселената со нова безбедносна стратегија

Германија ја усвои својата прва национална стратегија за вселенска безбедност, повикувајќи на развој на цврста сателитска инфраструктура што ќе биде способна да одвраќа за да се гарантира орбиталната безбедност. 

Новата стратегија, која денеска ја претстави кабинетот на канцеларот Фридрих Мерц, се фокусира на заеднички проекти со сојузниците, проширени сателитски мрежи и промоција на „одговорно однесување на државите“ во вселената. Таа доаѓа веднаш по септемвриското соопштение дека Министерството за одбрана ќе инвестира 35 милијарди евра во вселенски проекти до 2030 година.