text size
Израел прифати на 15 август да ги продолжи преговорите за прекин на огнот во Појасот Газа и за ослободување на заложниците што таму ги држи палестинското движење Хамас.
Израел се одлучи на тоа по интервенцијата на Соединетите Американски Држави (САД), Египет и Катар, кои ги предупредија двете завојувани страни дека нема повеќе време за губење или за изговори и дополнително одложување, пренесува Бета. До овој мал напредок доаѓа додека продолжуваат борбите во Појасот Газа, со најмалку 18 мртви во четвртокот во израелските напади врз две училишта, според наводите на палестинското исламистичко движење Хамас, и додека се стравува од сеопфатна војна на Блискиот Исток.
„По предлогот на САД и посредниците, Израел на 15 август ќе испрати делегација преговарачи на локацијата на која ќе се договараат деталите за конкретизирање на спогодбата“, соопштија од кабинетот на премиерот Бенјамин Нетанјаху. Засега од Хамас нема таква потврда, а не е јасно ниту кој би можел да биде нивен претставник во преговорите.
Вашингтон, Каиро и Доха ги повикаа спротивставените страни да продолжат со разговорите, посочувајќи дека рамковниот договор „сега е на маса и недостигаат само деталите за неговото спроведување“. „Како посредници, ние сме подготвени, доколку е потребно, да претставиме конечен предлог што би можел да ги реши прашањата за спроведувањето (на договорот) на начин што ќе ги исполни очекувањата на сите страни“, пишува во текстот од властите на САД, Египет и Катар.
Бенјамин Нетанјаху/Bloomberg
Катар со месеци е вклучен во преговори зад сцената, со поддршка од Каиро и од Вашингтон, за да се обиде да постигне примирје и договор за ослободување на заложниците што Хамас ги киднапира од Израел и ги држи во Појасот Газа.
Изгледите за прекин на непријателствата зависат од договор во фази, почнувајќи од прекин на огнот. Последните дискусии беа засновани на рамката поставена кон крајот на мај од американскиот претседател Џо Бајден, за која тој рече дека е предложена од Израел.
„Дојде време да се склучи спогодбата за прекин на огнот и за ослободување на заложниците и затворениците“, пишува во текстот, според кој „нема веќе време за губење ниту, пак, изговори за некоја од страните да го оправда натамошното одложување“.
САД не очекуваат договорот да биде подготвен за потпишување веднаш на 15 август, бидејќи има уште многу работа, при што двете страни се држат до своите цврсти позиции, изјави висок функционер од администрацијата на Бајден, кој сакаше да остане анонимен, пренесе „Блумберг“.
Со месеци преговорите беа во застој, делумно поради инсистирањето на Хамас уште од самиот почеток да се преговара за траен прекин на непријателствата, додека Нетанјаху долго инсистираше на тоа дека на израелските сили по паузата мора да им се дозволи да ја продолжат војната додека Хамас не биде целосно уништен.
Најновиот развој на настаните доаѓа откако Јахја Синвар беше назначен за нов политички лидер на Хамас. Израелските власти го обвинуваат него дека е еден од организаторите на нападот што исламистичкото движење го изврши врз Израел на 7 октомври, а таквиот став предизвикува страв дека и онака тешките преговори ќе станат уште потешки. Израел вети дека, како што соопшти, ќе го „елиминира“ Синвар, кој не се појавува во јавност од 7 октомври.
Јахја Синвар/Bloomberg
За десет месеци од војната, сите обиди за посредување пропаднаа, а војната, која според Хамас остави речиси 40.000 мртви на малата опколена палестинска територија, ги влоши тензиите на Блискиот Исток меѓу Иран и вооружените групи што ги поддржува од една страна и Израел од друга.
Дипломатските напори продолжуваат во сите правци за да се избегне ескалација низ целиот регион откако Иран вети одмазда за убиството на лидерот на Хамас, Исмаил Ханије, на 31 јули во Техеран, за што Техеран го обвини Израел, а еден ден претходно Фуад Шукр, воениот лидер на либанскиот Хезболах, поврзан со Хамас, беше убиен во израелски напад во јужното предградие на Бејрут.
.webp){kind=icon}
