Јапонскиот премиер Фумио Кишида нема да се кандидира за втор мандат како лидер на владејачката Либерално-демократска партија во септември, отворајќи го патот за трка на неговиот наследник за премиерската функција.
„Ќе се посветам на поддршката на новиот лидер избран на претседателските избори“, рече Кишида на националната прес-конференција во средата.
Со оглед на доминацијата на ЛДП во парламентот, победникот во лидерската трка, што се очекува кон крајот на септември, е речиси извесно дека ќе стане следниот премиер. Наследникот на Кишида ќе биде третиот премиер на Јапонија откако Шинзо Абе, лидерот со најдолг стаж во земјата, се повлече во септември 2020 година.
По вестите, јенот се зголеми, растејќи за околу 0,3 отсто во однос на доларот, додека јапонските берзански индекси беа мешани, при што Nikkei падна за 0,2, а Тоpix порасна за 0, 5 отсто. Фјучерсите на јапонските државни обврзници беа малку променети.
Поддршката на Кишида опаѓа со месеци поради фрустрацијата на гласачите поради неговото справување со широкиот скандал со партиските фондови, тековната инфлација и падот на јенот. Кишида, кој ја презеде функцијата пред речиси три години, рече дека серијата политички финансиски скандали ја нарушиле довербата и влијаеле на неговата одлука.
Владата на Кишида и централната банка се обидоа да покажат обединет фронт и да ја вратат смиреноста на финансиските пазари, откако најголемиот пад на акциите во повеќе од три децении овој месец предизвика критики за заострувањето на монетарната политика и фрли сенка врз напорите да се натераат домаќинствата да ги инвестираат своите средства.
Претходникот на Кишида, Јошихиде Суга, го критикуваше Кишида во интервју за медиумите на 23 јуни и рече дека би било од клучно значење за ЛДП да донесе „чувство за промена“ на следните лидерски избори.
„Првиот и најочигледен чекор за да се покаже дека ЛДП ќе се промени е да се повлечам“, рече Кишида во средата.
Иако општите избори треба да се одржат во 2025 година, некои истражувања покажуваат дека главната опозициска Уставно-демократска партија добива предност пред ЛДП на Кишида.
Следниот премиер може предвреме да распише избори за консолидирање на мандатот на новата влада. Но, ЛДП и нејзиниот помал коалициски партнер Комеито се очекува лесно да ја задржат контролата со оглед на нивната моќна позиција во националната политика.
Не е јасно кој ќе го замени Кишида на премиерската функција, иако поранешниот министер за одбрана Шигеру Ишиба беше најпопуларниот избор во анкетите на локалните медиуми. Други имиња кои често се појавуваат во анкетите се министерот за дигитална трансформација Коно Таро, министерката за надворешни работи Јоко Камикава и Шинџиро Коизуми, син на поранешниот премиер.
„Импликацијата на пазарот е дека јапонската политика ќе биде заматена“, рече Шоки Омори, главен стратег во Мизухо Секјуритис. „На учесниците на пазарот нема да им се допадне неизвесната ситуација, особено на оние кои инвестираат во ризични средства, како што се акциите“.
.webp){kind=icon}
Во моментов нема коментари за веста. Биди прв да коментира...