Трамп ќе воведе царини од 100 отсто за некои увезени лекови

Администрацијата на Трамп ќе воведе царини до 100 отсто за одредени увезени лекови, иако со неколку клучни исклучоци, што е маневар за притисок врз производителите на лекови да произведуваат повеќе во САД.

Новата давачка, која претседателот Доналд Трамп ја одобри во четврток, се однесува на лекови произведени во земји што немаат царински договори со САД, а се патентирани од компании што немаат договори со администрацијата за одредување-цени-за-најповластена-нација.

Давачките за производи произведени од одредени поголеми компании ќе стапат на сила за 120 дена, додека производите од помалите производители нема да бидат погодени уште 180 дена, според соопштението на Белата куќа.

Давачките за увоз од големите економии кои склучуваат договори со Белата куќа ќе бидат ограничени на 15 отсто. Тоа ги вклучува Европската унија, Јужна Кореја, Јапонија, Швајцарија и Лихтенштајн, се вели во соопштението. Увозот од Велика Британија ќе се соочи со пониска стапка.

Трамп го стресе светот објавувајќи ги царинските стапки првпат во април 2025 година. Фото: Bloomberg

 

Лековите произведени од компании кои се обврзуваат на одредено производство во САД ќе имаат увезени производи оданочени со 20 отсто, а доколку склучат договори за најповластена нација, стапката ќе падне на нула, соопшти Белата куќа. Ослободувањето од царина трае до 20 јануари 2029 година.

Овие најнови давачки се остварување на заканите што претседателот ги упати минатата есен за воведување 100 отсто царини на брендирани или патентирани лекови, освен ако компаниите не го преместат производството во САД. Но, тие исто така содржат значајни отстапки што би можеле да го намалат влијанието на мерките.

Повеќето од најголемите светски производители на лекови, вклучувајќи ги  „Мерк“ (Merck & Co.) и „Ели Лили“ (Eli Lilly & Co.), ги избегнаа казнените потези со склучување договори со администрацијата. Трамп минатото лето испрати писма до 17 компании со список на барања, вклучувајќи намалување на цените што ги наплаќаат за програмата „Медикејд“ (Medicaid) за лица со ниски приходи, директна продажба на американските потрошувачи, како и лансирање нови лекови по истите цени достапни во другите развиени земји, во замена за олеснување на царините.

Тоа значи дека новите царини главно ќе ги погодат помалите фармацевтски компании и производителите на состојки.

Генеричките лекови исто така нема да бидат погодени од новите царини, но мерката што Трамп ја потпиша му наложува на Министерството за трговија повторно да ги оцени тие производи во рок од една година, што остава можност за идни давачки во зависност од тоа колку производство е пренасочено, изјави официјален претставник на Белата куќа пред објавувањето.

Новите давачки се резултат на истрага започната во април 2025 година според член 232 од Законот за проширување на трговијата. Тоа му овозможува на претседателот еднострано да воведува давачки за увоз што се смета за закана за националната безбедност. Индустриските лобија изразија загриженост дека тие би можеле да предизвикаат хаос во синџирите на снабдување, да го зголемат недостигот од некои стоки и да ги зголемат трошоците за Американците.

Ова е најновиот протекционистички потег од Трамп, чија трговска агенда претрпе пораз во февруари кога Врховниот суд пресуди дека неговите глобални давачки го кршат Уставот на САД. Давачките наметнати на другите индустрии според член 232 не беа засегнати од таа пресуда. Трамп, исто така, во четвртокот презеде чекори за поедноставување и заострување на давачките за метали.

Трамп долго време го критикуваше странското производство на лекови како закана за националната безбедност и го зголеми спектарот на давачки до 200 отсто за да го поттикне домашното производство. Компаниите потоа објавија низа најави за инвестиции од повеќе милијарди долари во САД, но тоа не беше доволно за да се спречат давачките што произлегоа од истрагата на Министерството за трговија.

Производителите на лекови ќе се соочат со избор помеѓу апсорбирање на трошоците за царините или зголемување на цените на нивните лекови на она што е веќе најскапиот пазар во светот.

Помалку е јасно кога пациентите ќе ги почувствуваат ефектите - или колку ќе бидат значајни. Американците плаќаат повеќе за лекови од кој било друг во светот. Овие цени често се утврдуваат во сложена серија преговори меѓу нивните осигурителни компании, менаџерите за бенефиции од аптеките и производителите, што го отежнува веднаш пренесувањето на зголемените трошоци. Потрошувачите на крајот би можеле да се соочат со повисоки цени, преку зголемување на ко-плаќањата или поскапи полиси за осигурување.

-Со помош на Jennifer A Dlouhy