.webp){kind=icon}
Нов акциски план за заедничкиот регионален пазар на Западен Балкан за олеснување и зголемување на меѓусебната соработка на земјите, но и нивна побрза заедничка интеграција на европскиот пазар, се потпиша на берлинскиот самит. На самитот се сретнаа лидерите на Берлинскиот процес од Западен Балкан и поединечни претставници од земји членки на Европската Унија (ЕУ).
Bloomberg Mercury
Во соопштението се образложува дека продолжувајќи го напредокот постигнат во последните четири години, лидерите на Западен Балкан усвоија нов акциски план за заедничкиот регионален пазар за периодот 2025-2028 година, кој поставува насоки за подобрување на трговијата, мобилноста и инвестициите во регионот, како и за интеграција со единствениот пазар на ЕУ.
Планот има цел да го отклучи потенцијалот на регионот преку зголемување на трговијата и инвестициите и отворање на вратите за забрзана интеграција во единствениот пазар на ЕУ. Новиот четиригодишен план е поделен на шест столба, од кои ЦЕФТА ќе имплементира три: слободно движење на стоки, слободно движење на услуги и хоризонтални мерки во трговијата.
За време на самитот, новите одлуки на ЦЕФТА беа истакнати како револуционерно достигнување, кое ќе овозможи успешна имплементација на тековниот акциски план за заедничкиот регионален пазар.
„Секој од овие договори носи серија конкретни придобивки за нашите граѓани и економијата, без кои сложувалката на заедничкиот регионален пазар не би била комплетна. Но ова е само почеток. Лидерите јасно ја изразија својата желба за уште поголеми резултати, а ЦЕФТА е решена да ги испорача“, изјави Данијела Гачевиќ, вршителка на должноста директор на Секретаријатот на ЦЕФТА.
ЦЕФТА веќе усвои девет нови договори за унапредување на трговијата, работните места и правата на потрошувачите низ регионот, кои, како што е најавено, ветуваат реални и опипливи придобивки, како поедноставување на деловните операции, создавање нови работни места и зајакнување на заштитата на потрошувачите.
Како што изјави Данијела Гачевиќ минатата недела при усвојувањето на новите договори, ЦЕФТА е од фундаментално значење за слободното движење на стоки и услуги, стимулирајќи ги економскиот раст и интеграција.
„Со овие одлуки создаваме посилна и пообединета економска зона, каде што бизнисите ќе можат побрзо да растат, а потрошувачите ќе бидат заштитени дури и при купување надвор од своите локални пазари. Ова е значаен момент за ЦЕФТА, бидејќи се приближуваме кон целосно усогласување со пазарот на ЕУ“, рече таа.
Придобивките ќе се почувствуваат низ целата ЦЕФТА. На малите и средните претпријатија ќе им биде овозможено да извезуваат и да го искористат најдоброто од дигиталните пазари, додека потрошувачите ќе имаат поголем избор, подобри цени и квалитет и посилна заштита.
Во прилог се деветте одлуки и како тие ќе го променат трговскиот и економскиот пејзаж на ЦЕФТА.
Одбележувајќи ја десетгодишнината од Берлинскиот процес, во фокусот на лидерите се клучни иницијативите насочени кон поттикнување на економската интеграција, поврзаноста и одржливоста. Покрај трговијата и проширувањето на пазарот, на самитот беа разгледани и итните предизвици поврзани со зелената агенда и енергетското поврзување.
