Целта на самитот на Берлинскиот процес, кој по покана од германскиот канцелар Олаф Шолц се одржува во Берлин, е лидерите од Западен Балкан да ја продлабочат економската соработка, почнувајќи од енергетиката, посочи на Твитер претседателката на Европската комисија, Урсула фон дер Лајен.
„Нашиот пакет од една милијарда евра помош за Западен Балкан ќе ни помогне да ја обликуваме заедно нашата заедничка енергетска иднина“, додаде таа во објавата.
На самитот присуствува македонска владина делегација, предводена од премиерот Димитар Ковачевски, кој на сесијата за регионална соработка и заеднички регионални пазари истакна дека настанот е историски, затоа што доаѓа во време на продолжена криза, и од него се очекува да произлезат конкретни чекори што ќе ја зајакнат регионалната соработка во сите сфери.
МИА
Ковачевски на првата сесија посочи дека денеска се исполнува клучен дел од обврските во рамките на заедничкиот регионален пазар, усвоени на самитот во Софија пред две години, истакнувајќи дека сето ова е постигнато поради силната поддршка од германската влада, Европската комисија и интензивната комуникација на експертите и администрациите од земјите од Западен Балкан.
„Нашата меѓусебна политичка волја и посветеност за регионалната соработка се резултат на меѓусебно признаени интереси, кои дополнително нѐ поттикнуваат да работиме на развој на заеднички регионален пазар и зголемување на атрактивноста на регионот за странските инвеститори“, истакна премиерот на сесијата.
Тој рече дека на земјите од Западен Балкан, вклучувајќи ја и Северна Македонија, им претстои сериозна работа, затоа што дојде време кога ќе треба да се испорачаат суштински постигнувања во однос на подобрувањето на капацитетите, ефикасноста и конкурентноста на економиите и на регионот во целина, што ќе доведе до забрзан регионален економски раст и развој.
На сесијата, премиерот Ковачевски посочи дека Северна Македонија веќе ги почна преговорите со Европската Унија со заштитени идентитетски позиции, во тек е скринингот преку кој забрзано ќе се одвива реформската агенда на земјата, но исто така истакна и дека Европската Унија не е целосна без земјите на Западен Балкан и во таа насока треба да се интензивираат сите иницијативи што ќе придонесат кон приближување на регионот до ЕУ.
На самитот, лидерите од Западен Балкан заедно со претставници на владите од земјите од ЕУ, Обединетото Кралство и претставници на Европската комисија имаат можност да дискутираат за регионалната соработка и заеднички регионални пазари, за енергетска стабилност и трансформација, како и за перспективите на Берлинскиот процес и стратегиските прашања.
Во рамките на владината делегација што ја предводи премиерот, во Берлин се и вицепремиерот задолжен за европски прашања Бојан Маричиќ и министерот за надворешни работи Бујар Османи.
.webp){kind=icon}
Во моментов нема коментари за веста. Биди прв да коментира...