.webp){kind=icon}
Српската вицепремиерка и министерка за рударство и енергетика, Зорана Михајловиќ, денеска изјави дека за Србија е стратешки важно да изгради нафтовод со кој ќе излезе на Медитеранот, односно до пристаништата во Албанија и Грција и да биде транзитна рута кон север, поврзувајќи се со Унгарија, јави дописникот на МИА од Белград.
„Стратешки ни е важно да се поврземе преку Ниш и понатаму до Скопје со Солун и со Албанија, што ќе ни овозможи да имаме пристап до разни добавувачи и сите видови нафта и да имаме нафтовод до Унгарија и пристап до руска нафта. Се проценува дека за оваа диверзификација се потребни околу милијарда евра. Тоа е голема инвестиција, но и дава можност на Србија да биде целосно безбедна кога е во прашање снабдувањето со нафта, но и да биде транзитна рута. Тоа секако би бил меѓународен проект кој не се однесува само на Србија, туку и на други земји од регионот, а за такво нешто има интерес од други земји и меѓународни финансиски институции“, изјавила Михајловиќ, а соопштија од ресорното Министерство.
Таа посочи и дека на новата влада најважна ќе ѝ биде енергетиката бидејќи така Србија ќе биде политички посилна да ги спроведе потребните промени.
„Во енергетиката работите мора да се менуваат многу побрзо бидејќи ова ќе биде најважната област во следните 10 години“, изјавила Михајловиќ, а се наведува во соопштението.
И мандатарката на Владата, Ана Брнабиќ, денеска изјави дека „Србија почнува да гради нова енергетска политика“.
„Енергетиката е прашање на националната безбедност поради што мораме да ја смениме за да ја направиме Србија енергетски понезависна и побезбедна, а овие работи се менуваат од ден на ден“, рече Брнабиќ наведувајќи го примерот на Хрватска и нафтоводот ЈАНАФ.
