.webp){kind=icon}
Трошоците на домаќинствата за струјата, гасот и горивата ќе останат високи барем до пролет следата година, кога би требало да дојде до постепено намалување на цените на енергентите, смета аналитичкиот тим на „Блумберг Адрија“.
Клучни причини за одржувањето на растечкиот ценовен тренд до крајот на оваа и почетокот на 2023 година се ефектите од инфлаторното опкружување и нарушувањата во синџирот на снабдување, кои продолжуваат да влијаат врз движењата на цените на енергијата. Во цела 2023 година, поради пониската побарувачка предизвикана од економското забавување (под силно влијание на зголемувањето на стапките на централните банки), цените на енергијата треба да се намалат“, се наведува во извештајот, кој во целост можете да го преземете на линкот под текстот.
Во текот на оваа година, цените на енергентите за домаќинствата во регионот Адрија драстично се зголемија. Причина за тоа, според нашите аналитичари, беше зголемената побарувачка во 2021 година, која следуваше по пандемијата.
„Геополитичките и инфлаторните фактори дополнително го поддржаа растот на цените на енергентите низ целиот континент. Иако владините програми за помош помогнаа на многу начини, сепак, тие само го забавија притисокот врз цените, но не ги неутрализираа, ниту, пак, ги променија овие трендови“, стои во анализата на „Блумберг Адрија“.
Струја
Цените на електричната енергија во првата половина на 2022 година беа најниски во Србија (0,1787 евра за киловат-час), поради одлуката на Владата да понуди поволности за домаќинствата. Силна владина поддршка за граѓаните имаше и во Словенија, каде што нивото на цените е исто како во Македонија. Цените на струјата во регионот Адрија беа највисоки во Хрватска.
Гас
Гасот имаше највисока цена во Македонија (0,2548 евра за киловат-час). Овој енергент во земјава имаше најголем раст споредено со цела Европа, поради целосната зависност од увоз. Во другите четири земји од регионот Адрија цените беа пониски од европскиот просек (0,0870 евра).
Бензин и дизел
Според извештајот на нашите аналитичари, цената на бензинот во регионот (без Босна и Херцеговина, за која нема достапни податоци), од почетокот на пандемијата во март 2020 година, растела во опсег од највисоките 42 отсто во Македонија до 21 отсто во Србија. Најголеми осцилации во цената имало токму во земјава. Дизелот, пак, кај нас во моментов има највисок процент на раст споредено со целиот регион.
На линкот подолу е целосниот извештај на аналитичкиот тим на „Блумберг Адрија“.
