Стапуваат во сила работните дозволи за пазарите на Отворен Балкан

Српскиот вицепремиер и министер за финансии Синиша Мали на бизнис-форумот во Копаоник најави дека од утре, 5 март, ќе почне имплементацијата на системот за препознавање на заедничките работни дозволи меѓу Србија, Македонија и Албанија.

„Утре е 5 март, така што ќе стапи во сила системот за препознавање на работните дозволи меѓу Северна Македонија, Албанија и Србија. Тоа многу ќе придонесе за развојот на пазарот на трудот и флуктуацијата на кадрите“, изјави Мали.

Тој кажа дека тоа ќе значи можност некој што има работна дозвола, на пример во Албанија, да работи во Србија и обратно.

„Имајќи ги предвид нивото на платите, нивото на развој и нивото на БДП, нескромно очекуваме дека најголемиот број луѓе ќе ги најдат своето решение и желба да работат во Србија“, рече Мали.

За да можат граѓаните на Србија, Албанија и Македонија да се вработат во некоја од земјите на Отворен Балкан или оние што веќе нашле работодавец, треба да имаат идентификациски (ИД) број, кој ќе го креираат електронски.

Тоа подразбира дека корисникот има електронски идентитет на својот национален портал за е-управа, а потоа во неколку чекори креира свој ИД-број на Отворен Балкан.

Граѓаните на Србија до ИД-број на Отворен Балкан, кој им овозможува да користат услуги во рамките на иницијативата, можат да пристапат преку порталот е-Управа. Граѓаните на Македонија и на Албанија го креираат својот ИД-број преку нивниот национален портал за електронска управа.