Осомничениот маж од Калифорнија е обвинет за обид за убиство на американскиот претседател Доналд Трамп за време на нападот на гала вечера во Вашингтон за време на викендот. Кол Томас Ален, 31, за прв пат се појави пред федералниот суд во понеделник. Тој е обвинет и за прекршоци поврзани со оружје.
Во меѓувреме, абер нема од конечно завршување на војната со Иран, а „Голдман Сакс“ ја зголеми својата прогноза за цената на нафтата, бидејќи тековната блокада на Ормускиот Теснец предизвикува „екстремно“ намалување на резервите. Компаниите од еврозоната, пак, очекуваат значително повисоки продажни цени и трошоци за влезни средства поради војната во Иран, што дополнително ги зголемува загриженостите за инфлацијата во Европската централна банка.
Добро утро, ви пишува Игор Петровски од дигиталната редакција на „Блумберг Адрија“. Ги издвоивме овие пет вести за почеток на денот:
Трамп е „понижен“ во преговорите со Иран, вели германскиот канцелар Мерц
САД се „понижени“ од иранските лидери додека претседателот Доналд Трамп се труди да преговара за крај на војната, рече германскиот канцелар Фридрих Мерц во коментари што ризикуваат дополнително да ги заострат трансатлантските односи.
На необично искрен начин, германскиот лидер рече дека не гледа „каков стратешки излез избираат Американците сега“, додавајќи дека преговарачите на Техеран дејствуваат „многу вешто - или навистина многу вешто не преговараат“.
„Визер“: Имаме повеќе резервации и доволно гориво за летово
Унгарскиот авиопревозник „Визер“ (Wizz Air Holdings Plc) очекува да има доволно гориво за авиони за следниот месец - и покрај предупредувањата од индустријата за потенцијалeн недостиг- додека нискобуџетната авиокомпанија регистрира поголеми летни резервации отколку минатата година.
На прашањето дали резервите на гориво за авиони ќе бидат исцрпени во следните четири недели, како што некои предвидуваат, главниот извршен директор Јожеф Варади рече: „Не мислам дека ќе ни снема гориво“. Како резултат на тоа, авиокомпанијата со седиште во Унгарија очекува да го реализира целиот летен распоред без откажување на летови. Досега, обемот и приносите се повисоки отколку пред една година, рече тој.
Европа воведува стандард еуро 7, Македонија вози на еуро 4
Од крајот на ноември годинава стапува во сила стандардот еуро 7 за автомобилите и комбињата. Основната цел на новите правила на Европската Унија е дополнително намалување на дозволените емисии на штетни гасови и честички од возилата.
Додека новите европски правила ќе важат од 29 ноември за лесните возила, а за автобусите и камионите од 2027 година, во земјава продолжува увозот на возила според стандардот еуро 4. Единствената разлика е што при увоз на вакви возила давачките се повисоки. Како резултат на лабавата политика во земјава се увезуваат четири половни на едно ново патничко возило.
Тјунинг и дитејлинг – и македонските возачи сакаат да бидат „брзи и бесни“
Во последните години, автомобилската култура во Македонија и регионот на Адрија доживува тивка, но забележлива трансформација следејќи ги светските трендови. Сè поголем број сопственици на возила не се задоволуваат само со фабричките карактеристики на автомобилот, туку вложуваат време и средства во негово унапредување и персонализација. Во тој контекст, два поими стануваат сè почести – тјунинг (tuning) и дитејлинг (detailing).
Овие услуги, кои до пред десетина години беа резервирани за ентузијасти, колекционери на автомобили и тркачи, денес се дел од секојдневието на илјадници сопственици на автомобили во Македонија и поширокиот регион.
Приватните клубови го менуваат светот, регионот допрва влегува во темпо
Дискретен влез без знаци, рецепција што повеќе личи на дневна соба отколку на канцелариски простор и атмосфера каде што се дискутира за работата исто колку и за плановите за одмор, вака изгледаат модерните приватни клубови низ целиот свет. Некогаш симбол на старата аристократија и затворените социјални кругови, овие места денес доживуваат нова популарност, но во значително поинаква форма од порано.
Според меѓународната консултантска компанија „Најт Френк“ (Knight Frank), во светските метрополи се отвориле повеќе приватни клубови во последните четири години отколку во претходните три децении, што јасно го покажува обемот на новиот бран на интерес за вакви социјални простори.
.webp){kind=icon}
