Невреме за потсетување – пет вести на денот

Откорнати дрвја, кровови и настрешници предизвика невремето кое вчера попладне го зафати Скопје, што е само потсетување дека климатските промени се реалност која што ќе мораме да ја прифатиме и на која ќе мораме да се приспособиме. Поради невремето проследено со силен ветер, се евидентирани повеќе од 1.000 повици од граѓани, а освен материјални штети има и повредени лица.

Добро утро , ви пишува Владимир Николоски од дигиталната редакција на „Блумберг Адрија“. Подолу петте вести што ги издвоивме за почетокј на денот.

 

Кои се клучните фактори за висината на пензиите во Македонија?

Во македонската јавност во изминатиов период активно се води дебата околу стабилноста на пензискиот систем во земјата, главно поради тоа што од година во година се повеќе се зголемуваат трансферите од државниот буџет до Фондот за пензиско и инвалидско осигурување (ФПИОМ) без кои не би била можна редовна исплата на пензиите на осигурениците кои го оствариле правото на пензија. Во оваа дебата често се полемизира околу оправданоста на пензиската реформа со која пред две децении беше воведено капитално финансираното пензиско осигурување односно повеќестолебн систем во кој  функционираат првиот столб (државниот ФПИОМ), задолжителниот втор столб (приватни пензиски фондови) и доброволниот трет столб(приватни пензиски фондови).

И покрај тоа што поминаа две децении од реформата во јавноста се уште се шират шпекулации и постојат нејасностии околу причините за оваа реформа, начинот на кој се распределуваат придонесите на осигурениците, како тие се оплодуваат од страна на приватните фондови и каква би била висината на пензиите на идните пензионери доколку постоеше само ФПИОМ односно дали приватните фондови ја оправдуваат нивната улога.

 

Светска ранг-листа на акциските пазари - каде заработија инвеститорите, а каде изгубија?

Добро е познато дека Белградската берза е меѓу најмалку ликвидните пазари во регионот. Полугодишните пресеци покажуваат дека нејзината позиција во 2026 година е уште понеповолна: индексот BELEX15 падна за 5,21 процент од почетокот на годината, рангирајќи го меѓу најслабите берзански индекси во светот.

Во таква средина, не е изненадувачки што вишокот пари во Србија сè уште е првенствено насочен кон банкарски заштеди или пазарот на недвижности. Ограничената ликвидност, малиот број квалитетни инвестициски можности и неизвесноста околу можноста за продажба на акции ја прават берзата помалку привлечна за домашните инвеститори, па затоа термините како „сламаризација“ и „цигларазација“ сè уште добро ги опишуваат инвестициските навики на граѓаните.

 

„Визер“ ја проширува базата во Скопје, достапни повеќе дестинации

Авиокомпанијата „Визер“ ја прошири својата база на Меѓународниот Аеродром Скопје со седми авион, што според Владата и „ТАВ Македонија“ претставува значаен чекор за натамошен развој на воздушниот сообраќај, зголемување на поврзаноста на земјата и раст на бројот на патници. „Седми авион ќе биде дел од базата на ‚Визер‘ во Скопје.

Ова е големо достигнување и нешто со што многу национални авиокомпании не можат да се пофалат. Затоа често знам да кажам дека ‚Визер‘ практично стана национален авиопревозник на Македонија - порача денеска од скопскиот аеродром, вицепремиерот и министер за транспорт Александар Николоски и оцени дека станува збор за значајно достигнување за македонското воздухопловство. Тој посочи дека бројките го потврдуваат растот на авиокомпанијата на македонскиот пазар, наведувајќи дека минатата година „Визер“ превезла 1,7 милиони патници, додека во првите шест месеци од годинава превезла 1,2 милиони патници.

 

Американски суд ја запре зделката за преземање на „Ворнер Брос“ од страна на „Парамаунт“

Сојузната судијка Арасели Мартинез-Олгин привремено го запре преземањето на компанијата „Ворнер Брос. Дискавери“, вредно 110 милијарди долари, од страна на „Парамаунт Скајденс“, оценувајќи дека таа трансакција најверојатно би ги прекршила американските антимонополски закони. Судијката во понеделникот им наложи на компаниите за 14 дена да го одложат финализирањето на договорот.

„Парамаунт“ и „Ворнер Брос.“ планираа трансакцијата да ја завршат веќе на 22 јули. Калифорнија и уште 11 сојузни држави на 13 јули поднесоа тужба со која бараат блокирање на ова гигантско холивудско спојување. Според наводите во тужбата, спојувањето на две од петте најголеми филмски компании би ја загрозило конкуренцијата во дистрибуцијата на филмови и кабелската телевизија.

 

Битка за „Адико“: За понудата на „Рајфајзен“ прифатени 55,5 отсто од акциите, засега нема повлекување

Трката за преземање на австриската банка „Адико“ влегува во најнапнатата фаза. Австриската „Рајфајзен банк интернешнл“ - РБИ (Raiffeisen Bank International - RBI) соопшти дека заклучно со 20 јули примила изјави за прифаќање на понудата за вкупно 10.703.509 акции, што претставува 55,5 отсто од акциите на „Адико“ што се предмет на понудата. Со тоа, понудата на РБИ го надмина минималниот праг на успешност поставен на 55 отсто.

Во наведениот процент е вклучен и директниот пакет на српската „Алта груп“ (Alta Grupa) од 1.878.167 акции, односно 9,63 отсто од основната главнина на банката. „Алта груп“ претходно се обврза дека ќе ја поддржи РБИ во замена за планираното преземање на подружниците на „Адико“ надвор од Европската Унија, доколку трансакцијата биде успешно завршена.