Денеска ви нудиме комплетна вивисекција на автомобилскиот сектор. Какви ќе бидат цените следната година, може ли да се случи смрт на дизелот, кој е крив што не ни тргна со продажбата на електричните возила, се прашањата на кои се обидуваме да одговориме додека проблемите на германската автомобилска индустрија се продлабочуваат. Индексот на деловна клима во германската автомобилска индустрија, кој во ноември падна на-32,1 поени, додека во октомври изнесуваше-28,6 поени, покажуваат податоците на германскиот институт Ифо (Ifo).
Еве што треба да знаете за почеток на овој ден:
Ќе поскапуваат ли автомобилите следната година?
Силната конкуренција во автомобилската индустрија, нормализирањето на состојбата во синџирите за снабдување и претпазливоста на потрошувачите, кои се изгорени од високата инфлација во изминатиов период, се главните причини поради кои не треба да се очекува пораст на цените на автомобилите во текот на 2025 година.
Агенцијата „Фич рејтингс“ очекува стабилност во глобалниот автомобилски сектор, при што глобалната продажба на лесни возила се предвидува да се зголеми за околу два процента.
Крај за дизелашите во 2025 година? Македонија е преплавена
Дали двајца клиенти на „Мерцедес“ ќе им пресудат на милиони дизел-возила во Европа? Сè ќе зависи од пресудата што во 2025 година треба да ја донесе Европскиот суд на правдата во Луксембург. Постапката почна кога двајцата купувачи од „Мерцедес“ се пожалиле пред судот во Дуисбург дека се измамени. Во жалбата тие навеле дека нивните дизел-возила еуро 5 емитуваат повеќе штетни материи од бројките што ги објавува производителот. Кај судот во Дуисбург исто така се јави сомнеж дека еуро 5 може да испушти повеќе штетни материи во секојдневниот живот отколку што е дозволено при процедурата за лабораториско испитување. За да се разјасни целата ситуација, германскиот суд го испрати предметот пред Европскиот суд на правдата.
Атанасиос Рантос, главниот адвокат на Европскиот суд на правдата, ги дели сомнежите на германскиот суд. Тој смета дека граничните вредности на загадувачките супстанции тестирани според правилата на НЕДЦ (NEDC – технички стандард за процена на емисиите кај патничките возила) мора да се почитуваат не само во лабораторија туку и на патиштата, додека возилото вози во реални услови, на пример при поголеми брзини, со различни модели на гуми, со различни услови на патот, при возење по нагорнини и надолнини.
Електричните возила во Европа во рикверц, во Македонија не ни тргнаа во прва
И додека на пазарите во Европската Унија (ЕУ) ситуацијата во автомобилската индустрија секојдневно зоврива од пад на нарачки, штрајкови, оставки, со изразен пад на продажбите кај електричните возила (ЕВ), во Македонија продажбата на овој тип возила не се ни искачила до некое позначително ниво, за да се почувствува каков било застој или намалување.
„Нема некакви промени во продажбата на електрични возила за разлика од претходно“, вели Андреј Чурлинов од „АБЦ Брадерс“ (ABC Brothers), овластен дистрибутер во земјава за кинеската компанија „ДФСК“ (DFSK), коишто имаат и електрични возила во својата понуда.
Цените на становите во Дубаи допрва ќе растат, вилите се распродадени
Цените на становите во Дубаи веројатно ќе продолжат да растат следната година, откако веќе пораснаа за 20 отсто во 2024 година, што претставува продолжение на неуморното закрепнување што започна по пандемијата, соопштија од „Најт Френк“ (Knight Frank).
За целокупниот пазар се очекува вредностите на резиденцијалните недвижности да пораснат за 8 отсто следната година, додека за луксузните недвижности ќе пораснат за 5 отсто во просек, се наведува во новиот извештај на брокерската куќа.
Кој мобилен оператор во Македонија има најмногу претплатници?
Бројот на активни претплатници во мобилната телефонија во државата заклучно со вториот квартал годинава изнесува 1.919.695, од кои од резиденцијалните 679.245 се припејд-претплатници, а 992.157 постпејд. Бројот на деловни постпејд-претплатници изнесува 248,293. Реализирани се 1.409.062.356 минути разговор.
Податоците од извештајот на Агенцијата за електронски комуникации покажуваат дека пристап до интернет со широк и тесен опсег преку мобилна мрежа (2G/3G/4G) во вториот квартал годинава имале 1.549.967 претплатници.
.webp){kind=icon}
