Австралија ги забрани услугите на „Дипсик“ (DeepSeek AI) на сите владини системи и уреди, станувајќи една од првите земји што презедоа директни мерки против кинескиот стартап за вештачка интелигенција, кој годинава ги потресе Силициумската Долина и глобалните пазари. Чекорот има за цел заштита на националната безбедност.
Добро утро, ова се петте вести важни за почеток на денот
Во игра неколку компании: Ќе сведочиме ли на трка за првото ИПО во Македонија?
Македонскиот пазар на капитал со години ниту видел ниту помирисал некаква ИПО (од англиски: Initial public offering – IPO), односно компанија што преку јавна понуда на акции ќе собере свеж капитал за својот раст и развој. Се зборувало многу за тоа на конференциски панели, трибини или обуки, но тешко се одлучувале бизнисмените да ја сменат својата ментална матрица и да решат наместо во банка, по пари да одат на берзата и својата сопственост да ја поделат со одреден број акционери.
Но одеднаш интересот на инвеститорската јавност го привлекуваат две најави за ИПО: прво, пред неколку месеци „Дајнерс клуб Македонија“ најави дека сака да стане котирана компанија на Македонската берза, а деновиве и од стриминг-платформата „Глеј“ (Gley) објавија дека подготвуваат иницијална јавна понуда.
Анализираме: Кој зема минимална плата во Македонија?
Помалку од четири отсто од вработените во земјава земаат минимална плата од 22.567 денари, покажуваат податоците на Управата за јавни приходи (УЈП). По барање на „Блумберг Адрија“, УЈП подготви анализа врз основа на конечни и платени МПИН-пресметки, односно врз основа на податоците за исплатени плати за декември 2024 година.
Анализата покажува дека во последниот месец од минатата година на сметките на вкупно 21.193 вработени легнал законски минималниот износ од 22.567 денари. Податоците на УЈП за минатата година покажуваат дека бројот на вработени за кои се исплаќаат плати и придонеси варира од месец на месец и се движи над 550.000 лица.
Поради недостигот на кафе цената расте најдолго во последните 45 години
Кафето е на пат да ја оствари најдолгата победничка низа од 1980 година, бидејќи пазарот се соочува со постојани проблеми со снабдувањето во клучните региони за одгледување.
Фјучерсите за сортата арабика, која е омилена во кафулињата, пораснаа за 1,6 отсто во вторникот. Премиум зрната поскапуваат десетти ден по ред и се тргуваат на речиси 4 долари за фунта, откако износот се удвои во текот на изминатата година.
Група инвеститори ја предупредува ЕУ да не попушта за ЕСГ
Група инвеститори кои застапуваат имот во вредност од 6,6 трилиони евра ги повикуваат европските претставници да не потклекнуваат на зголемениот притисок за намалување на регулативите за ЕСГ во Унијата. Планираните правила за известување се од суштинско значење за да им помогнат на менаџерите и сопствениците на средства да идентификуваат каде да ги распределат средствата, смета групата инвеститори.
Предупредувањето се совпаѓа со зголемениот притисок од Германија и Франција, двете најголеми економии во Европската унија, да ги намалат планираните регулативи за ЕСГ поради загриженоста дека барањата ги спречуваат компаниите во Унијата слободно да се натпреваруваат со нивните ривали од САД и Азија.
Дубаи гради нови ексклузивни вили за да ги привлече светските ултрабогаташи
Дубаи додава нова серија на луксузни вили и станови – некои опремени со кина, спа-центри и приватни лифтови – додека инвеститорите привлекуваат милионери од целиот свет.
Овие ултралуксузни домови се ценат од 60 милиони до над 120 милиони долари, бидејќи купувачи од Европа, Азија и од Америка се натпреваруваат за нив. Дури и според стандардите на емиратот, познат по својата љубов кон гламурот, овие домови се сè поекстравагантни.
.webp){kind=icon}