Дубаи гради нови ексклузивни вили за да ги привлече светските ултрабогаташи

Дубаи додава нова серија на луксузни вили и станови - некои опремени со кина, спа-центри и приватни лифтови - додека инвеститорите привлекуваат милионери од целиот свет.

Овие ултралуксузни домови се ценат од 60 милиони до над 120 милиони долари, бидејќи купувачи од Европа, Азија и од Америка се натпреваруваат за нив. Дури и според стандардите на емиратот, познат по својата љубов кон гламурот, овие домови се сè поекстравагантни.

Еден градежник транспортирал огромен стаклен ѕид илјадници километри за да му го овозможи на сопственикот посакуваниот поглед кон морето. Друг вградил приватно лоби и лифт за купувач на луксузен стан толку голем што се протега низ две кули. Трет создал подвижен под за базенот на клиентот, кој се издигнува за да се спои со плочките на градината за време на забави.

Цените на пазарот на недвижности во Дубаи се стабилизираат по порастот од 2021 година. Но тоа не ги спречува градителите да додаваат нови палати по должината на најскапите локации на плажите во градот.

„Горниот дел од пазарот е најпрофитабилен“, вели Марк Феникс, извршен директор на „Санкари“ (Sankari Properties), чија компанија гради ултралуксузна кула вредна милијарда долари. „Ако се направени правилно, градителот може да ги продаде за максимални цени“.

Пазарот во Дубаи се спротивставува на глобалниот тренд додека цените на луксузните резиденции забавуваат или паѓаат на многу други меѓународни пазари.

Луксузните градби во Дубаи привлекуваат купувачи од целиот свет Palace Group

Минатата година во Дубаи беа продадени 435 дома вредни повеќе од 10 милиони долари, достигнувајќи рекорд и надминувајќи ги Њујорк и Хонгконг, според „Најт Френк“ (Knight Frank). Истражувачот на недвижности проценува дека цените на ултралуксузните домови ќе пораснат за најмалку пет отсто годинава во емиратот по порастот од околу 67 отсто од 2021 година.

Богатите семејства што  купуваат втор и трет дом на глобално ниво сè уште можат да најдат повеќе простор за истите пари во Дубаи. Според квадратен метар, цените во емиратот се една третина од оние во Њујорк и една петтина од оние во Лондон, според Махди Амџад, основач на „Омнијат“ (Omniyat), градител на ултралуксузни апартмани.

Меѓународен репер

„Ги споредуваме нашите згради со згради во Њујорк и откриваме дека за слични или можеби пониски цени добивате многу поголем простор и многу поголемо искуство и удобност“, рече Амџад, кој очекува да додаде уште сто ултралуксузни дома годинава.

Градителите во Дубаи често се принудени да одат на екстремни мерки за да се натпреваруваат со големите метрополи.

При неодамнешна посета на градилиште, „Блумберг њуз“ (Bloomberg News) виде огромна стаклена купола што се гради во центарот на една вила. Таа е наменета да покрие базен и спа-центар и може да се повлече кога сопствениците сакаат да се сончаат. На други места има извртени базени, кои им овозможуваат на станарите да пливаат од барот до спа-центарот на другиот крај од градината.

Вештачките острови на Дубаи се омилени локации. Вилите на островот во форма на морско коњче, познат како остров на милијардерите, обично доаѓаат со приватни плажи и ротирачки платформи за паркирање, кои автоматски ги вртат автомобилите во вистинската насока.

Фирмата за советување за богатство „Хенли енд партнерс“ (Henley & Partners) процени дека 6.700 милионери ќе одат во Обединетите Арапски Емирати во 2024 година, надминувајќи ги сите други земји.

Нацрт за луксузна кула што се гради на Палм Џумеира Omniyat

Но задоволувањето на каприците на глобалните богаташи не е евтино - ниту лесно.

Додавањето екстравагантни удобности значи „дека градењето чини многу повеќе со почетни трошоци за дизајн. Тоа е позиција од која многу градители се плашат“, вели Феникс.

Висам Дама, основач на градежната фирма „Палас груп“ (Palace Group), имал купувач што сакал целиот ѕид на неговата огромна дневна соба да биде направен од едно парче стакло. Со димензии од 17 на 4 метри (55 на 13 стапки), тоа е големина на некои базени. Тој не бил сигурен дали може да најде едно парче стакло со таа големина, а камоли да го инсталира. И купувачот сакал стаклениот ѕид целосно да исчезнува со притискање копче за да има отворен поглед на морето.

Кога Дама контактирал со еден од најголемите производители на стакло во Германија, на компанијата ѝ биле потребни 45 дена да одлучи дали може да ги исполни спецификациите. На крајот се согласиле, но само ако друга швајцарска фирма може да го состави механичкиот систем за поместување на стаклениот ѕид. Тоа барало изградба на подземна просторија за огромното парче стакло да се спушти кога ќе се активира механизмот. Потоа, биле потребни специјални дозволи за транспорт со брод и камион поради неговата големина. Клиентот на крајот го добил изгледот што го сакал.

„Повеќето од нашите клиенти имаат повеќе домови во градови низ целиот свет и тие се многу специфични за тоа што им се допаѓа и што очекуваат“, вели Дама. Тој има 15 нови вили во изградба, заедно со зграда со 70 апартмани, со комбинирана вредност од 16 милијарди дирхами (4,4 милијарди долари).

Веќе речиси една петтина од домовите во Дубаи се проценети на над 1 милион долари во услови на раст на последните години, според фирмата за недвижности „Најт Френк“.