„Гугл“ (Google) започна нов фонд наречен AI Futures Fund, наменет за поддршка на стартапи што развиваат решенија базирани на вештачка интелигенција (ВИ). Иницијативата е предводена од одделот „Гугл лабс“ (Google Labs), во соработка со „Дипмајнд“ (DeepMind), а целта е забрзување на развојот на клучни генеративни модели, како Џеминај (Gemini), Имаген (Imagen) и Вео (Veo), и нивна трансформација во иновативни производи. Можноста за финансирање можат да ја искористат и македонски стартапи.
Добро утро, ви пишува Владимир Николоски од дигиталната редакција на „Блумберг Адрија“. Подолу петте вести што ги издвоивме за почеток на денот.
Кој е кој на пазарот на повластени производители на струја во Македонија?
Од 1.502 домашни производители на електрична енергија во Македонија лани 1.494 користеле обновливи извори на енергија, а од нив 179 користеле повластена тарифа, 53 користеле премија, додека 1.262 електроцентрали не користеле мерки за поддршка за производството на електрична енергија, покажуваат податоците од годишниот извештај за 2024. на Регулаторната комисија за енергетика, водни услуги и услуги за управување со комунален отпад.
Учеството на производители коишто користеле мерки на поддршка во вкупниот инсталиран капацитет од обновливи извори на енергија изнесува 16 проценти, додека во вкупниот инсталиран капацитет во држвата изнесува 9 проценти. Анализиравме на кои повластени производители им припадна најголем дел од колачот вреден над 40 милиони евра.
Компаниите и граѓаните „гладни“ за кредити, банките ќе ги олеснуваат кредитните услови
Олеснување на кредитните услови за компаниите и граѓаните и зголемување на побарувачката за кредити очекуваат македонските банки во второто тримесечје од годинава, покажува новата анкета за кредитна активност на Народната банка. Во првиот квартал на 2025 година, анкетата укажува на натамошно олеснување на вкупните услови за одобрување корпоративни кредити, посилно во споредба со претходниот квартал.
Олеснувањето на условите за кредитирање на претпријатијата во првиот квартал е во согласност со очекувањата дадени од банките во претходната анкета за овој квартал. За вториот квартал од 2025 година, се очекува натамошно нето-олеснување на кредитните услови за одобрување корпоративни кредити. Анализирано од аспект на поединечните услови за кредитирање на претпријатијата, во првиот квартал од 2025 година банките укажуваат дека кај сите услови за кредитирање се забележува зголемено нето-олеснување.
Послабиот долар наводно нема да биде дел од американските преговори за царините
Американските претставници што сакаат да преговараат за трговски договори низ целиот свет не работат на вклучување ветувања за валутна политика во договорите, според лице запознаено со ова прашање. Девизните пазари се вознемирени поради загриженоста дека администрацијата на претседателот Доналд Трамп е насочена на послаб долар и дека би можела да користи трговско договарање за да ја постигне таа цел.
Јужнокорејскиот вон вчера порасна за речиси два отсто во однос на доларот, а порасна и јапонскиот јен. Во текот на месецов валутата на Тајван забележа најголем скок во последните децении. Министерот за финансии Скот Бесент е единствениот член на економскиот тим на администрацијата на Трамп што е задолжен да се справи со овие прашања и тој не ги овластува другите претставници да се вклучат во разговори за валутна политика со трговските партнери.
Цената на златото паѓа - позитивните знаци на пазарите ја намалуваат побарувачката
Златото го продолжува својот пад откако вчера поевтини за повеќе од два отсто поради знаците дека ќе има помалку намалувања на каматните стапки од претходно очекуваните, а од друга страна намалувањето на трговските тензии меѓу САД и Кина ја намали и побарувачката за благородниот метал што важи за безбедно засолниште во неизвесен период.
Цената на златото утрово падна за повеќе од еден отсто, на околу 3.140 долари за унца, што е најниско ниво во повеќе од еден месец. Приносите на американските државни обврзници пораснаа поради очекувањата дека Федералните резерви (Фед) ќе ги намалат трошоците за позајмување подоцна отколку што се очекуваше поради подобрувањето на економските перспективи по трговското примирје меѓу САД и Кина. Повисоките приноси и стапки имаат тенденција да бидат негативни за златото што не носи камата.
„Староста ме стигна“ – Ворен Бафет отворено за повлекувањето од бизнисот
Не почнав да стареам, по некоја чудна причина, сè до деведесеттата, изјави Ворен Бафет во интервју за „Волстрит журнал“ (The Wall Street Journal), најавувајќи го своето повлекување од позицијата главен извршен директор на „Беркшир Хатавеј“ (Berkshire Hathaway). На 94 години, легендата на американскиот бизнис реши да му ја препушти функцијата на Грег Ејбел, човекот што со години важи за негов најлогичен наследник.
Бафет откри дека нема конкретен момент кога ја донел одлуката, туку дека таа дошла природно, како дел од процесот на стареење. „Како знаеш кога точно стануваш стар?“, прашува реторички, додавајќи дека одеднаш почнал да чувствува промени – нарушена рамнотежа, проблеми со помнење имиња, па дури и печатот во весниците почнал да му изгледа избледено.
.webp){kind=icon}
