Инфлацијата во септември 2025 година, во однос на септември 2024 година, бележи зголемување од четири проценти, а индексот на цените на мало бележи зголемување од 4,1 проценти, соопшти Државниот завод за статистика.
Добро утро, ова се петте вести што се важни за почеток на денот.
Европската зависност од кинески батерии е геополитичка закана
Кина во август забележа рекорден извоз на електрични возила, батерии, соларни панели и друга зелена технологија. Според најновиот извештај на тинк-тенкот „Ембер“ извозот достигнал 20 милијарди долари.
„Кина достигна рекордна вредност во извозот на чиста технологија, и покрај тоа што цените на технологијата нагло паднаа,“ изјави Јуан Греам, аналитичар на податоци во „Ембер“.
Финансиските друштва уриваат рекорди: Над 227.000 договори за брзи кредити
Финансиските друштва во Македонија ја завршиле минатата година со 227.706 активни договори за кредитирање со физички лица, со вкупна вредност од 9,2 милијарди денари (150,7 милиони евра), што е убедлив рекорд од 2014 година наваму, покажуваат податоците на Народната банка.
Драстично помал е бројот на активни договори на финансиските друштва со правни лица, кој заклучно со 2024 година изнесувал 584 договори, со вкупна вредност од 1,3 милијарда денари (21,5 милион евра).
Вложувањето во оружје ги подели ЕСГ-експертите
Воените конфликти во Европа и енергетските кризи темелно ги променија правилата на одржливото инвестирање. Она што некогаш беше незамисливо – фонд со ЕСГ-ознака да инвестира во производители на оружје – денес станува нова реалност за сè поголем број европски портфолија.
Според податоците на „Блумберг“, од руската инвазија на Украина, бројот на ЕСГ-фондови изложени на индустријата за нуклеарно вооружување пораснал за повеќе од 50 проценти, надминувајќи 2.000 фонда. Денес приближно половина од тие фондови во Европа држат барем дел од капиталот во производители на оружје.
Грифин од „Ситадел“: Трката по злато како посигурно средство е загрижувачка
Кен Грифин од „Ситадел“ (Citadel) изјави дека инвеститорите почнуваат да го гледаат златото како побезбедно средство од доларот, што според милијардерот е „вистински загрижувачки“.
„Забележуваме значително зголемување на вредноста на средствата подалеку од доларот, бидејќи луѓето бараат начини за ефикасно дедоларизирање или намалување на ризикот во нивните портфолија во однос на ризикот поврзан со американските државен долг“, рече Грифин во интервју за „Блумберг“ во понеделникот.
Значителен раст на приходите на „Реплек“
„Реплек“ во периодот од 1 јануари заклучно со 30 септември годинава оствари приходи од 26 милиони евра, што е раст од 18 проценти во однос на истиот период минатата година, соопшти компанијата. Од продажбата на домашниот пазар во „Реплек“ реализирале приходи од 6,25 милиони евра, додека од странските пазари се остварени 19,74 милиони евра.
„Овие резултати се јасен показател дека нашата стратегија за одржлив раст, иновации и силно присуство на странските пазари дава резултати. Нашата компанија континуирано вложува во иновации, дигитализација, лансирање нови производи и проширување на пласманите, со цел да обезбеди повисок квалитет, поголема ефикасност и уште поголема сигурност и доверба од нашите деловни партнери, како и од пациентите“, изјави Душан Пецовски, генерален директор на „Реплек“.
.webp){kind=icon}
