„Енвидија“ (Nvidia Corp.) се согласи на договор за лиценцирање со стартапот за вештачка интелигенција „Грок“ (Groq), продолжувајќи ги своите инвестиции во компании поврзани со бумот на вештачката интелигенција (ВИ) и добивајќи го правото да додаде нов вид технологија во своите производи. Најголемата јавно тргувана компанија во светот плати за правото да ја користи технологијата на „Грок“ и ќе го интегрира дизајнот на нејзиниот чип во идните производи.
Добро утро, ви пишува Владимир Николоски од дигиталната редакција на „Блумберг Адрија“. Подолу петте вести што ги издвоивме за почеток на денот.
Сѐ што треба да знаете за е-фактурата во Македонија
Следната година конечно ќе стартува проектот за е-фактура, а подготовките на даночните власти за воведување на системот се одвиваат според планот. Веќе на почетокот на следниот месец ќе бидат објавени апликативниот програмски интерфејс (API-Application Programming Interface) за компаниите и техничката спецификација за софтверот и ќе почне нивното тестирање.
До 31 март 2026 година треба да биде објавена и клиентската апликација, која ќе биде бесплатна за симнување од страна на корисниците. И конечно од 1 октомври 2026 година се очекува целосна имплементација на системот за е-фактура за сите корисници. Најавите од Управата за јавни приходи се дека, паралелно со тестирањето на системот, ќе почне формирањето и на тим за поддршка на даночните обврзници, а од септември ќе бидат спроведувани и анкети за задоволство.
Светските и регионалните ЕТФ-ови уриваат рекорди, Македонија го чека првиот
Додека ЕТФ-овите (од англиски: exchange traded funds - фондови кои се тргуваат на берза) во светот и во регионот уриваат рекорди во нови приливи на капитал и во обемот на тргување, во Македонија се уште се чека на отворање на првиот ваков фонд и останува неизвесно дали тоа ќе се случи и во новата 2026 година.
Како што објави „Блумберг њуз“, на помалку од една недела до крајот, се очекува 2025 година да биде рекордна година за американската ЕТФ индустрија која тежи 13 билиони долари. ЕТФ-овите котирани на берзата во САД привлекоа огромни 1,4 билиони долари досега во 2025 година, соборувајќи го рекордот за годишен прилив поставен минатата година. Во исто време, повеќе од 1.000 нови производи влегоа на пазарот - уште еден рекорд. Обемот на тргување на пазарот на ЕТФ, исто така, достигна нов годишен максимум.
Моќен и жеден - Го тестиравме „Силајон 7“ најлуксузниот модел на “БЈД“
„Силајон 7“ целосно ја оправдува титулата најлуксузен модел на „БЈД“ (BYD), но неговите извонредни перформанси доаѓаат со прилично голема „жед“ за струја, особено кога ќе го притиснете посилно – што со задоволство и ќе го правите. За каква моќ станува збор доволно говори податокот дека автомобил тежок речиси 2,5 тони од нула до 100 километри на час забрзува за 4,5 секунди.
Станува збор за забрзување што буквално ве лепи за седиштето, но во целосна тишина и во премиум амбиент. Токму тоа е и најсилниот адут на карактерот на „Силајон“ – таа комбинација на сурова моќ и елеганција. Ви овозможува на семафор без проблем да оставите зад себе автомобили поскапи и за стотина илјади евра, но и опција мирно и удобно да крстарите, знаејќи дека во секој момент можете да ја „лансирате“ лаѓата долга 4,8 метри до максимална брзина од 215 км/ч.
Хакерски напад во надворешна фирма-соработник на „Голдман Сакс“
„Голдман Сакс груп“ (Goldman Sachs Group Inc.) ги предупреди инвеститорите во некои од неговите алтернативни инвестициски фондови дека нивните податоци можеби биле откриени при пробив во една од адвокатските фирми на банката. Во писмо од 19 декември од „Голдман“ изјавија дека биле информирани за „инцидент со сајбер-безбедноста“ од страна на „Фрид Фрeнк Харис Шрајвер и Џејкобсон“ (Fried Frank Harris Shriver & Jacobson LLP), која служи како надворешен советник за многу од нејзините алтернативни фондови. Банката истакна дека соработува со адвокатската фирма за подобро да разбере дали нејзините или податоците на нејзините клиенти можеби биле откриени.
Писмото беше вклучено во предложената групна тужба поднесена вчера против „Фрид Френк“ од страна на Ендру Сакс, инвеститор во офшор фондот „Питершил прајват еквити сидинг II“ (Petershill Private Equity Seeding II Offshore Fund) на „Голдман“.„Системите на ‘Голдман Сакс’ не беа погодени од овој инцидент и остануваат безбедни“, изјави портпарол на банката. „Како и секогаш, ние ќе продолжиме да работиме на заштита на нашите клиенти и нивните податоци“.
Американските органи најавуваат „уште милион документи“ за престапникот Епстајн
Министерството за правда на САД соопшти дека федералните обвинители во Њујорк идентификувале и предале „уште милион документи“ што можеби се поврзани со истрагата за Џефри Епстајн, што сигнализира значително проширување на јавните објави за осудениот сексуален престапник што започнаа минатата недела.
Министерството за правда во средата објави на X дека ги добило документите од канцеларијата на американскиот обвинител за Менхетн и ФБИ и дека ќе ги прегледа за објавување. „Имаме адвокати што работат деноноќно за да ги прегледаат и да ги направат неопходните цензури за да се заштитат жртвите и ќе ги објавиме документите што е можно поскоро“, се наведува во објавата на Министерството за правда. „Поради огромниот обем на материјал, овој процес може да трае уште неколку недели.“
.webp){kind=icon}
