Волстрит го започна февруари со добивки на акциите, бидејќи солидните фабрички податоци го зајакнаа оптимизмот за корпоративна Америка, додека загубите на златото и среброто се ублажија по драматичниот пад во петокот. Приносите од обврзниците се зголемија заедно со доларот.
Добро утро, ви пишува Владимир Николоски од дигиталната редакција на „Блумберг Адрија“. Подолу петте вести што ги издвоивме за почеток на денот.
Во банките чуваме рекордни 10,7 милијарди евра иако инфлацијата ги „јаде“ каматите
Вкупните депозити во Македонија заклучно со декември 2025 година достигнаа 661,2 милијарди денари (10,7 милијарди евра) што е зголемување за 10,1 проценти во однос на истиот месец претходната година и убедлив рекорд. Со тоа продолжува повеќегодишниот тренд на континуиран раст на депозитите кај македонските банки кој главно е поттикнат од штедењето на домаќинставата.
Индикативно е дека штедењето во изминатиов период расте и покрај разгорената инфлација која беше и сѐ уште е повисока отколку каматите на депозитите, поради што се обезвреднува приносот на штедачите. Анализиравме кои се причините зад ваквите трендови и дали граѓаните можат преку пласман на своите пари во други финансиски инсутрументи да заработат повеќе отколку преку банкарските депозити.
Цената на какаото на тригодишен минимум, непродадените залихи влијаат на пазарот
Фјучерсите за какао го продолжија падот на најниско ниво од ноември 2023 година, бидејќи врвните производители се борат да најдат доволно купувачи за своето производство. Најактивниот договор падна за дури 5,4 проценти и се тргуваше под 4.000 долари пред да ги намали загубите. Фјучерсите се намалени за повеќе од 30 проценти оваа година поради загриженоста за уништување на побарувачката и потенцијалот за поголем од очекуваниот вишок.
Падот ги оптоварува синџирите на снабдување во Брегот на Слоновата Коска и Гана, каде што извозниците и регулаторите се борат да ги исполнат договорените продажби на многу повисоки нивоа. Тоа ги забавува купувањата од земјоделците и ги остава зрната заглавени во магацините. Пазарот очекува регулаторите да ги распродадат акумулираните залихи, додека купувачите остануваат настрана поради слабата побарувачка.
Биткоинот се лизга надолу, каде е дното?
Пазарот на криптовалути бележи подлабок пад на цените; биткоинот се тргува под 80.000 долари, што е нешто помалку од 40 проценти од својот врв од 126.200 долари минатиот октомври (златото исто така нагло падна, но многу помалку од биткоинот). Тој изгуби околу 14 проценти од својата вредност за само пет дена, бидејќи цената падна од околу 90.000 долари на сегашните 77.800 долари. Што се случува на пазарот и дали сега е вистинското време да се купи биткоин?
„Прашањето дали сега е вистинското време за купување биткоин е актуелно повеќе од кога било досега - и со добра причина. Пазарите поминаа низ период на нестабилност, некои стравови, некои сомнежи, но ова се моментите кога краткорочната бучава е одвоена од долгорочната слика“, изјави за „Блумберг Адрија“, Марко Павловиќ, менаџер за портфолио на платформата за тргување „Икономи“ (Iconomi).
Нова С-класа - последна шанса на „Мерцедес“ да ја одбрани луксузната круна?
Опкружен со повеќе од еден век автомобилска историја во Музејот на Мерцедес-бенц во Штутгарт, тениската легенда Роџер Федерер возеше целосно црна лимузина од класата С на сцената, осветлен од камери и придружен од инспиративна музика, додавајќи допир на ѕвездено достоинство на најновиот обид на германскиот производител да ја одбрани својата луксузна круна.
Покрај појавувањето на Федерер, премиерата вклучуваше кратко појавување и од извршниот директор на „Енвидија“ (Nvidia Corp) Џенсен Хуанг. Извршниот директор на моментално највредната компанија во светот донесе допир од Силициусмката долина преку видео врска проектирана над целиот оркестар. Ваквиот спектакл е невообичаен за скромно освежување на моделот и покажува колку е важен овој момент за „Мерцедес“ (Mercedes-Benz Group AG).
Филмот за Меланија: Скапа стратешка лиценца со неочекувано силно отворање
Документарниот филм „Меланија“, кој светска премиера имаше на 30 јануари, ги следи 20-те дена непосредно пред инаугурацијата на Доналд Трамп за претседателскиот мандат, фокусирајќи се на подготовките на првата дама, Меланија Трамп, за влез во Белата куќа и нејзиниот поглед на улогата што ќе ја преземе по вторпат.
„Амазон студиос“ за правата на филмот плати рекордни 40 милиони долари, дури тројно повеќе од другите учесници - „Дизни“ и „Парамаунт“. Со дополнителни 35 милиони долари вложени во маркетинг, вкупните трошоци за продукција и промоција достигнуваат околу 75 милиони долари, што го прави филмот најскапиот документарец што „Амазон“ некогаш го лиценцирал и истовремено ризичен финансиски потег, бидејќи овој формат исклучително ретко поминува добро на благајните.
.webp){kind=icon}
