На домашниот пазар за нафтени деривати веќе се чувствува криза. Уште во текот на вчерашниот ден некои од продавачите или не продаваа или ги ограничија количините кои можат да бидат наточени во едно возило. Големите корисници кои вообичаено имаат попусти, вчера може да купат гориво само по редовна, повисока цена.
Во меѓувреме, американско-израелската војна против Иран се води шести ден по ред со малку надеж за стивнување, бидејќи Исламската Република вети дека ќе ја интензивира својата одмазда, а нафтата продолжи со поскапувањето.
Добро утро, ви пишува Игор Петровски од дигиталната редакција на „Блумберг Адрија“. Подолу се петте вести што ги издвоиме за почеток на денот.
Кои земји се најзасегнати од иранската блокада на Ормускиот теснец?
Кина, Индија, Јапонија, Јужна Кореја и други земји од Азија се директно најпогодени од иранската блокада на поморскиот транспорт на нафта преку Ормускиот теснец која следуваше откако Израел и САД извршија напад врз една од најголемите земји во Персискиот залив.
Како што објави „Блумберг њуз“, станува збор за клучен проток за пазарот на нафта, поради тоа што низ него се одвива околу една четвртина од светската поморска трговија со нафта. Освен енергијата, Ормутскиот теснец е пречка за извоз на алуминиум и земјоделски производи, вклучувајќи шеќер и ѓубрива.
Само уште Иран ѝ фалеше на европската автоиндустрија: какви ќе бидат последиците?
Кинеските производители на автомобили и европскиот „Стелантис“ (Stellantis) се соочуваат со најголеми загуби директно поврзани со нападот врз Иран и затворањето на Ормускиот Теснец. Блокадата го нарушува автомобилскиот пазар на Блискиот Исток, кој регистрирал продажба на околу три милиони нови возила во 2025 година, според наодите на глобалната консултантска куќа „Бернстајн“ (Bernstein), а пренесени од аналитичкиот веб-сајт „Инвестинг“ (Investing.com).
Регионот апсорбирал 17 отсто од вкупниот извоз на патнички возила на Кина во 2025 година, удел што пораснал со петгодишна кумулативна стапка на раст од 59 отсто, според податоците на кинеските царински служби цитирани од „Бернстајн“.
Трамп сфаќа дека Европа му треба сега кога води војна во Иран
Со години, Европа ги трпеше поплаките на претседателот Доналд Трамп дека е самодоволен континент кој се крие под безбедносниот чадор на Америка. Сега, кога ја почна првата воена кампања од неговото претседателствување за којашто не се знае кога ќе биде крајот, европските лидери се наоѓаат во позиција да поседуваат нешто што му е сè уште потребно: нивните бази, воздушен простор и стратешкaта позиционираност.
И покрај нејзината воздржаност, Европа веќе е вовлечена во војната. Откако британската база на Кипар беше погодена од беспилотно летало во неделата, Франција, Велика Британија и Грција се активираа да ја одбранат малата членка на ЕУ. Тоа е затоа што европските нации располагаат со некои од највредните недвижности што ѝ се достапни на американската војска.
Ништо од „брзата лента“ за Украина и Западен Балкан во ЕУ
Надежите на Украина, но и на некои земји од Западен Балкан за забрзано членство во Европската унија биле урнати на дипломатска вечера во Брисел, пишува бриселски „Политико“. Според весникот, амбасадорите на повеќе ЕУ членки му соопштиле на шефот на кабинетот на претседателката на Европската комисија, Урсула фон дер Лајен, дека тие нема да го прифатат контроверзниот предлог на Комисијата за т.н. „обратно проширување“ (reverse enlargement) или „авансно проширување“ (enlargement in advance).
Според овој концепт, Украина би можела прво формално да стане членка на Унијата, а потоа постепено да ги усогласува своите политики и обврски со европското законодавство. Предлогот бил дел од поширок пакет идеи за можноста земјата да се приклучи кон ЕУ до 2027 година.
Како синдромот „прегорување на работа“ ја менува феминистичката агенда?
Привлечноста на мемоарите за прегорувањето на работа потсетува на класичните исповеди за зависност од дрога или алкохол, со шокантни детали и драматични падови до дното, само што наместо бурни ноќи и ризичен секс, тука добиваме осамени ноќни смени и напади на паника на работната маса.
Во ова преиспитување на сопствената амбиција има и причина за славење, бидејќи ексцесите на културата на постојаната трка по успех навистина постоеја. Но благородните цели за рамнотежа меѓу работата и приватниот живот лесно можат да се претворат во регресивен дефетизам и во отровна порака дека вредните жени се наивни или измамени.
.webp){kind=icon}
