Криза за гориво - дали в понеделник ќе има ценовен шок и во земјава

Регулаторната комисија за енергетика вчера ја укина одлука според која секогаш кога цените на гориво треба да се зголемат или намалат за 2 денари ќе прави нови пресметки и ќе утврдува нови цени.

Ова практично значи дека Комисијата ќе заседава само во понеделник, како во редовни услови и дека до почетокот на идната недела нема да одлучува за нови цени на горивата и тие ќе се продаваат по цените кои беа утврдени на редовната седница во понеделникот. Тогаш бензините поскапеа за денар, а цената на дизелот  остана непроменета.

На пазарот веќе се чувствува криза. Уште во текот на вчерашниот ден некои од продавачите или не продаваа или ги ограничија количините кои можат да бидат наточени во едно возило. Големите корисници кои вообичаено имаат попусти, вчера може да купат гориво само по редовна, повисока цена.

Извори од нафтениот бизнис за „Блумберг Адрија“ велат дека состојбата не е поволна. Во моментов купуваат поскапи деривати, а ги продаваат по стари цени. Од петокот, пред почетокот на конфликтот во Иран, цената на барел нафта е повисока за 10 долари. Досега, според нивните пресметки, горивата требаше да поскапат во опсег од 6 до 8 денари за литар.

Што не очекува в понеделник?

Во одлуката што вчера ја донесе Регулаторната се наведува дека се брише членот 6-а од Правилникот за формирање највисоки малопродажни цени на одделни нафтени деривати и горива за транспорт.

Членот 6-а кој сега е избришан беше вметнат во правилникот во март 2022 година кога почна руската инвазија во Украина и цените на нафтата нагло скокнаа. Неговата цел беше горивата постепено да поскапуваат за да се избегнат ценовни шокови.

„По исклучок од член 6 од овој правилник во услови на зголемување или намалување на берзанските цени на нафтените деривати и/или на курсот на УСД доларот во однос на денарот, коишто ќе предизвикаат зголемување или намалување поголемо или еднакво на 2,00 денари/литар за моторни бензини, дизел гориво и масло за горење, односно 0,300 денари/килограм за мазут, во однос на соодветните цени утврдени во последната одлука за определување на највисоките малопродажни цени на одделни нафтени деривати и горива за транспорт, Регулаторната комисија за енергетика донесува одлука за нови највисоки малопродажни цени на одделни нафтени деривати и горива за транспорт“, стои во избришаната одлука.

Изменет е и членот 8 според кој одлуки за цените на горивата ќе се носат само во понеделник.