Двоцифрената инфлација би требало да се врати во Обединетото Кралство и да се задржи до крајот на годинава и покрај напорите на владата да ги ограничат сметките за енегија, покажува истражувањето на Блумберг, спроведено меѓу економистите во периодот од 7 до 13 октомври.
Податоците на Блумберг покажуваат дека економијата веќе се наоѓа во рецесија, која што ќе трае до втората половина од 2023 година и дека референтната каматна стапка на британската Централна банка скоро двојно ќе порасне на почетокот од следната година, на 4,25 отсто.
Очекувања на аналитичарите кои Блумберг ги анкетираше во периодот од 7 до 13 октомври / Bloomberg Mercury
Бројките ги отскликуваат тмурните прогнози на владата на премиерката Лиз Трас, која се обидува да поттикне раст и да ги ублажи ефектите од скокот на цените на електричната енергија и природниот гас, предизвикан од руската инвазија врз Украина.
Истражувањето заврши во четвртокот, пред турбуленциите во владата на Трас, која во петокот го отпушти министерот за финансии и се повлече од дел од обврските за намалување на даноците во настојувањето да се уверат инвеститорите дека државниот долг нема да излезе од контрола.
Податоците за инфлацијата во Обединетото Кралство ќе бидат објавени во среда. Економистите предвидуваат дека ќе изнесува 10 проценти во септември, што е зголемување од 9,9 отсто, колку што беше во претходниот месец, а мерено на годишно ниво. Сепак, таквата стапка на инфлација би била пониска од врвот достигнат во јули, кога изнесуваше 10,1 отсто. Подоцна во текот на неделава треба да бидат објавени и податоците за продажбата на мало, кои што може да покажат остар пад во септември, најмногу како последица од рекордниот пад на довербата на потрошувачите, покажува истражувањето.
Економистите кои ги анкетираше Блумберг ги намалија своите прогнози за бруто домашниот производ (БДП), предвидуваји пад од 0,4 отсто во следната година и раст од 1,2 проценти во 2024 година, што би било далеку под целта на премиерката за раст од 2,4 отсто.
Очекувања на анкетираните аналитичари за раст на БДП / Bloomberg Mercury
Се проценува дека рецесијата ќе трае цела година, почнувајќи од третиот квартал, за кога се претпоставува дека производството паднало за 0,2 отсто. БДП нема повторно да расте до последниот квартал од 2023 година. Средната прогноза за инфлацијата во последниот квартал годинава е дека ќе изнесува 10,3 отсто, после што ќе почне да се намалува на 6,2 отсто во 2023 година и 2,6 отсто во 2024 година. И тоа е над целта на британската Централна банка дека растот на цените ќе биде само 2 проценти во 2024 година.
Економистите ги намалија бројките за оваа и за следната година за 0,2 процентни бодови, односно за 0,6 проценти, откако британската влада вети замрзнување на сметките за енергија почнувајќи од овој месец.
.webp){kind=icon}
