Инфлацијата во еврозоната забави за првпат по една и пол година, нудејќи трошка надеж за Европската централна банка (ЕЦБ), која грчевито се бори да го задуши најлошиот раст на потрошувачките цени со кој се соочи оваа генерација.
Податоците за ноември покажаа дека инфлацијата е 10 отсто, објави Евростат во средата, што е помалку од 10,4 отсто, колку што очекуваа економистите анкетирани од „Блумберг“. Падот од 10,6 отсто во октомври е најголем од 2020 година, a за него е заслужен побавниот напредок во трошоците за енергија и услуги, иако цените на храната растат забрзано.
Инфлацијата во еврозоната забави за првпат по една и пол година / Bloomberg
Претставниците на ЕЦБ претходно ги истакнаа податоците како клучни во понатамошната процена дали да се зголемат каматните стапки за 75 базични поени третпат по ред - исход што сега можеби е помалку веројатен. Креаторите на политиката најверојатно ќе разговараат за извештајот на состанокот в среда, кога ќе се сретнат за последен пат пред да донесат одлука дали да ги зголемат стапките на 15 декември.
Иако се однесува само на еден месец, намалувањето на ценовните притисоци ќе донесе олеснување за ЕЦБ, која половина година се соочуваше со стапки на инфлација што постојано ги надминуваа прогнозите на економистите. Новиот извештај се совпаѓа со американската статистика од октомври, која исто така тргна по пат на послаб раст, охрабрувајќи некои претставници на Федералните резерви да размислат за намалување на темпото на зголемување на каматните стапки.
Стапката на инфлација во еврозоната остана двоцифрена веќе втор месец, а официјалните лица неделава се обидоа да внимаваат да не предизвикаат лажни надежи. Претседателката на ЕЦБ, Кристин Лагард, во понеделникот пред Европскиот парламент изјави дека ќе биде „изненадена“ ако растот на цените го достигнал врвот.
Bloomberg
Нејзиниот заменик Луис де Гвиндос претходно месецов се пожали на претходните „негативни изненадувања“. Во вторникот тој нагласи дека „сигналот што треба да се следи е растот на основната инфлација“.
Потпретседателот можеби мислеше на базичната инфлација, која ги исклучува цените на храната и енергијата. Таа мерка останува непроменета, на пет проценти, покажа извештајот од средата.
Низ континентот неделава беа објавени извештаи за послаб раст на потрошувачките цени, при што послаба е инфлацијата во Германија, Италија, Шпанија и Холандија. Таа неочекувано се задржа во Франција. Растот на цените се забрза само во три земји од еврозоната.
Претставниците на ЕЦБ ќе ги искористат податоците како показател за ценовните притисоци, но и за нови квартални економски прогнози. Покрај тоа што ќе го покажат патот на инфлацијата, проекциите веројатно ќе откријат како трошковниот шок го уништува европскиот економски раст, додека веројатно е во тек рецесија.
.webp){kind=icon}
Во моментов нема коментари за веста. Биди прв да коментира...