.webp){kind=icon}
Милиони барели руска сурова нафта и гориво се префрлени меѓу танкери на само неколку милји од грчкиот брег. Ова е едно од бројните решенија што трговците ги користат за да ги надминат санкциите на Европската унија против Москва.
Најмалку 23 милиони барели руска сурова нафта и дополнителни количини рафинирани горива се префрлени од еден на друг танкер во заливот Лаконикос од почетокот на оваа година, покажува следењето на танкерите на „Блумберг“. Грчките власти велат дека нивниот опсег на интервенција е ограничен бидејќи активноста се одвива надвор од границата од шест милји во територијалните води.
Трговците и бродските компании најдоа многу начини како да го задржат протокот на руската нафта, а ова е само најновиот пример. Слични активности имаше и во близина на Сеута, шпанската енклава во Северна Африка. Огромна флота танкери, исто така, се појави за да и помогне на земјата да ги надмине санкциите.
Замената на товар на море - позната меѓу трговците како пренос од брод на брод или STS (англ. ship to ship)- треба да исполнува неколку услови за да се одвива безбедно. На компаниите од ЕУ им е дозволено да ги обезбедуваат овие услуги само ако товарот на бродот е купен по или под ценовното ограничување на Г7.
Азиска врска
Откако ќе се разменат товарите, танкерите што примаат ја транспортираат нафтата илјадници милји, до клиентите во Азија.
Грција е земја со најмногу сопствени нафтени танкери во светот и кога ЕУ преговараше за ограничување на цената на руската нафта, земјата беше меѓу оние кои се залагаа за повисоки прагови. Земјата беше, исто така, меѓу оние кои се залагаа за послаби ограничувања на транспортот на руска нафта кога се разговараше за соодветните мерки.
Многу од вклучените пловни објекти се стари и нивниот статус на осигурување е нејасен. Просечната старост на танкерите вклучени во претовар на сурова нафта во близина на Грција е 18 години. Најстариот е изграден во 1997 година. Овие податоци се споредуваат со пошироката флота танкери кои најчесто се користи за транспорт на руска нафта чија просечна старост е околу 12 години.
Транспортот од брод до брод не е ризичен, но вклучува два брода кои пловат во морето и пумпаат потенцијално загадувачки товар од еден до друг.
Заливот е дом на проект за зачувување на морските желки, додека блиското устие обезбедува хранење и место за размножување на птиците.
Шпанскиот пример
На почетокот на оваа година, откако се појави активност од брод до брод во близина на Сеута, шпанските власти испратија писмо до локалните компании за поморски услуги во кое ги потсетија на забраната за обезбедување вакви трансфери, доколку се работи за руска нафта.
Правилата на ЕУ диктираат дека компаниите треба да вршат длабинска анализа, како и да проверат и да собираат сертификати кои докажуваат дека товарите со нафта се купени под ограничување на цените. Властите исто така треба да вршат проверки и контроли на компаниите.
Сепак, казните се благи и имаат ограничено влијание врз сопствениците и компаниите кои учествуват во трансферите на руската нафта
