.webp){kind=icon}
Европската Унија (ЕУ) има цел да им дозволи на земјите-членки да имаат опција ефективно да ги забранат руските испораки на течен природен гас без да воведуваат нови енергетски санкции. Министрите за енергетика на блокот се подготвени да поддржат предлог што ќе им даде можност на владите на членките привремено да ги спречат руските извозници однапред да резервираат инфраструктурен капацитет потребен за пратките, се вели во документот што „Блумберг“ го доби на увид.
Иако на поединечни влади сè уште ќе им требаат консултации, вклучувајќи и со другите земји од ЕУ и Европската комисија, за да го применат механизмот, алатката би можела да продолжи да го намалува протокот на енергетски производи од Русија.
Одобрувањето се очекува да дојде како дел од поширокиот политички состанок на министрите, кој се одржува денеска во Брисел. За предложената регулатива сепак ќе треба одобрение од Европскиот парламент, кој понуди свои решенија за ограничување на увозот на руски гас.
Притисокот за нови овластувања за блокирање на увозот е предводен од Финска, Естонија, Летонија, Литванија и Полска. Овој потег е дел од напорите на ЕУ да се оддалечи од рускиот гас по инвазијата на претседателот Владимир Путин врз Украина.
Иако протокот на природен гас преку гасоводите падна на рекордно ниско ниво, испораките од Москва на течен природен гас се зголемија.
Шефот на ЕУ за енергетика, Кадри Симсон, претходно овој месец повика да се запрат испораките на руски течен природен гас, велејќи дека компаниите не треба да ги обновуваат долгорочните договори откако ќе завршат сегашните. Шпанија, која годинава е најголем купувач на руски течен природен гас во ЕУ, побара од компаниите да не се пријавуваат за нови купувања од Русија.
На нивниот состанок, министрите за енергетика исто така треба да ја потпишат и регулативата со која ќе се бара новите автомобили да имаат нула емисии по 2035 година, што ќе означи ефективен крај на ерата на автомобили со согорување. Мерката, која се смета за клучен столб на амбициозниот Зелен договор, е подготвена да биде одобрена по договорот меѓу Европската комисија и Германија за одредбите што ќе овозможат простор за автомобили што работат само на т.н. е-горива по 2035 година.
Нуклеарен застој
Агендата на собирот ја вклучува и првата дискусија на министрите за редизајн на пазарите на електрична енергија во регионот, како и предлогот на комисијата за продолжување на доброволната цел за намалување на побарувачката на гас од 15 проценти за уште една година, со цел да се олесни притисокот врз снабдувањето следната зима. Моменталната мерка истекува на крајот од месецов.
Се очекува разговорите да бидат особено интензивни околу темата нуклеарна енергија во услови на притисок од страна од Франција и истомислениците да добијат кредит за технологијата според плановите на блокот за зголемување на уделот на обновливи извори на енергија дури до 45 проценти до крајот на деценијата.
Според најновиот нацрт-предлог, кој „Блумберг“ го доби на увид, шведското претседателство се подготвува за нефосилни извори на енергија, со цел да придонесе кон тие цели во пресрет на преговорите со парламентот в среда. Франција и другите членки на таканаречената нуклеарна алијанса исто така ќе повикаат на повеќе инвестиции во мали модуларни реактори, нова нуклеарна технологија што овозможува помали капацитети од тие што моментално се во функција.
„Нуклеарната енергија ќе придонесе за декарбонизирана енергетска мешавина, унапредување на амбициозните климатски цели и важната цел за одржување на конкурентноста на индустријата на ЕУ. Унијата мора да преземе итна акција за да избегне заостанување во искористувањето на придобивките од развојот, комерцијализацијата и примената на таа технологија“, се наведува во нацрт-писмото што го виде „Блумберг“.
