Уште стотици сопственици на обврзници на „Кредит Суис“ (Credit Suisse Group AG) го тужат швајцарското банкарско регулаторно тело откако нивните хартии од вредност, чија вредност беше околу 1,7 милијарда долари, беа збришани за време на преземањето на заемодавецот од страна на ривалот УБС (UBS Group AG), со посредство на владата.
Адвокатската фирма „Палас партнерс“ (Pallas Partners), која поднесе тужба до швајцарскиот суд на 18 април, посочи дека агенцијата „Финма“ (Finma) нема право да наложи отпис и бара целосна компензација за своите клиенти - 90 институционални инвеститори и менаџери на средства со 1,35 милијарди долари во т.н. обврзници АТ1, како и 700 мали клиенти што изгубиле околу 300 милиони долари.
„Ова е злоупотреба на процесот и Швајцарија не требаше да ја користи процедурата за да дозволи УБС да го преземе ’Кредит Суис’ на штета на сопствениците на AT1“, посочи основачката и извршна партнерка во „Палас“, Наташа Харисон, во соопштението.
Последните тврдења значат дека инвеститори што претставуваат повеќе од една третина од 17 милијарди долари во обврзници AT1 издадени од „Кредит Суис“ сега се обиделе да си ги вратат парите. Американската адвокатска фирма „Куин Емануел“ (Quinn Emmanuel) минатиот месец поднесе тужба до швајцарскиот суд застапувајќи повеќе од 400 институционални инвеститори што поседувале АТ1 во вредност од околу 4,5 милијарди долари, а поднесени се уште најмалку две тужби.
Создадени по финансиската криза во 2008 година, обврзниците АТ1 имаат сочни приноси во добри времиња, но први добиваат удар кога банката ќе наиде на неволја. Дури и акционерите - честопати првото домино што паѓа во такви ситуации - спасија одредена вредност по преземањето смислено од швајцарските власти, додека сопствениците на AT1 од „Кредит Суис“ останаа без ништо. Многу сопственици на обврзници беа огорчени од овој потег. Европските регулатори брзо се обидоа да ги уверат инвеститорите дека швајцарскиот аранжман е исклучок.
Сопствениците на обврзници тврдеа дека промената на законот еден ден пред отписот на обврзниците е неправедна и неисправен процес што ги менува конвенциите за несолвентност, каде што имателите на обврзници имаат приоритет пред акционерите.
Сепак, потегот на „Финма“ беше покриен со законите за итни случаи донесени на 18 и 19 март. Поддржувачите на отписот укажуваат и на фактот дека ситните букви на обврзниците секогаш предупредувале дека постои можност за отпис на нула.
„Финма“ одби да коментира за тужбата на „Палас“. Претходно го објави својот став за отпишувањето, објаснувајќи дека тоа е дел од планот за преземање што бил најмалку лоша опција откако „Финма“ и владата го одбија затворањето или привремената национализација на „Кредит Суис“.
.webp){kind=icon}
