Инфлацијата во Турција забави под 40 отсто

Инфлацијата во Турција забави на најниско ниво од 2021 година, бидејќи претседателот Реџеп Таип Ердоган го исполни предизборното ветување за обезбедување бесплатен природен гас за домаќинствата во изминатиот месец.

Потрошувачките цени во мај пораснале за 39,6 отсто во однос на лани, што е нешто помалку од очекувањата, но и во однос на 43,7 отсто од претходниот месец, покажуваат податоците објавени во понеделникот на статистичкиот институт „Туркстат“ (TurkStat). На месечна основа, инфлацијата беше блиску до нула за првпат во четири години.

И покрај тоа што годишната инфлација забави седми месец по ред, откако во октомври достигна максимум од речиси 86 отсто, олеснувањето за домаќинствата веројатно нема да трае, бидејќи турската валута потона и веќе се тргува на рекордно ниско ниво.

Како знак дека притисокот врз трошоците останува покачен, базичната инфлација, која ги исклучува цените на енергијата и храната, забрза во мај и достигна годишен раст од 46,6 отсто, од 45,5 отсто во април.

Ердоган, кој победи во вториот круг на претседателските избори пред нешто повеќе од една недела, го обновува својот економски тим за да ја врати довербата на инвеститорите, по годините на неконвенционални политики. Мехмет Шимшек, новиот министер за финансии на Турција, во неделата рече дека главната цел ќе биде борбата против инфлацијата на рационална основа.

Шимшек, кој беше заменик-премиер и министер за финансии во претходните кабинети на Ердоган, е поранешен стратег на „Мерил Линч“, почитуван од инвеститорите поради неговата одбрана на конвенционалната економија.

Под притисок на Ердоган, централната банка се воздржа од затегнување на монетарната политика во услови на зголемена инфлација и ги турна каматните стапки под нулата. Следниот состанок за утврдување на стапките е закажан за 22 јуни.

Во моментов нема коментари за веста. Биди прв да коментира...

Остави коментар