.webp){kind=icon}
Германската влада го прифати предлог-законот кој ѝ дозволува да презема акции во проблематичните енергетски компании.
Парламентот оваа недела треба да расправа за законот.
На овој начин, Германија ќе може формално да преземе удел во поранешната подружница на „Гаспром“, „Гаспром Германија“, со која моментално управува германскиот енергетски регулатор.
Новите законски одредби ќе овозможат германската влада да има посилно влијание во справувањето со енергетската ситуација, која значително се влоши по руската инвазија на Украина.
Законот дозволува владата да преземе удел во компании под нејзина привремена управа без согласност на сопствениците. Досега, капиталното зајакнување во вакви ситуации беше можно само со согласност на сопственикот, но сега ќе може и без него, со цел да се стабилизира работењето на компанијата и енергетската сигурност.
Фиктивна компанија
Министерот за економија, Роберт Хабек, претходно повика на целосна национализација на „Гаспром Германија“, но на канцеларот Олаф Шолц тоа не му се допадна бидејќи беше загрижен дека тоа би можело да го налути рускиот претседател Владимир Путин и да доведе до дополнителна ескалација на енергетскиот конфликт.
Групацијата „Астора“, која припаѓа на „Гаспром Германија“, управува со најголемото складиште за гас во земјата лоцирано во северниот германски град Реден и се смета за клучно за енергетската безбедност.
Германија на актуелниот сопственик би му пратила обесштетување за преземање на уделот во енергетската компанија.
„Гаспром“ претходно соопшти дека повеќе не е сопственик на поранешната германска филијала, но не го откри новиот сопственик. Во трансакцијата, според известувањето до регулаторот, е вклучено акционерското друштво „Палмари“, но не се знае кој е вистинскиот сопственик. Според пишувањата на медиумите, станува збор само за фиктивна компанија со корени од Москва.
Во обид да ја зголеми енергетската безбедност, Германија оваа недела издаде дозвола за изградба на првиот терминал за течен природен гас (ЛНГ) што ќе се наоѓа во Вилхелмсхавен на северот на земјата. Пловечкиот терминал треба да има капацитет од над седум милијарди кубни метри гас годишно и да започне со работа на почетокот на следната година.
