.webp){kind=icon}
Во август 2023 година пазарот на автомобили во Европската Унија (ЕУ) порасна за 21 отсто, достигнувајќи 787.626 регистрирани возила, што претставува тринаесетти последователен месец на раст, се наведува во најновиот извештај на Европската асоцијација на производители на автомобили (АЦЕА).
И покрај тоа што август е традиционално полош месец за продажба на автомобили, двоцифрениот пораст покажува дека пазарот на ЕУ закрепнува од минатогодишниот недостиг од компоненти. Двоцифрен процентуален раст е забележан на повеќето пазари, вклучувајќи ги и трите најголеми: Германија (+37,3 отсто), Франција (+24,3 отсто) и Италија (+11,9 отсто).
Од јануари до август 2023 година регистрациите на нови автомобили во ЕУ значително се зголемија (+17,9 проценти), на вкупно 7,1 милиони возила. И покрај ова подобрување од почетокот на годината, пазарот сè уште е значително послаб во споредба со претпандемиската 2019 година, кога беа продадени девет милиони возила.
Позитивни трендови преовладуваат низ целиот континент, така што повеќето пазари забележаа двоцифрена процентуална добивка во годинешниот осуммесечен период, вклучувајќи ги и четирите најголеми: Шпанија (+20,5 отсто), Италија (+20,2 отсто), Франција (+16,6 отсто) и Германија (+16,5 отсто).
Bloomberg Mercury
Раст на електричните возила
Во август пазарниот удел на електричните автомобили за првпат надмина 20 отсто (од 11,6 отсто во споредба со минатиот август), претекнувајќи го дизелот по вторпат оваа година, и стана трет најпопуларен избор за купувачите на нови автомобили. Хибридите ја задржаа својата позиција како втор избор на купувачите, со пазарен удел од 24 отсто, додека автомобилите на бензин сè уште се најпопуларниот избор, нивниот пазарен удел падна на 32,7 од 38,7 отсто во август минатата година.
Во август 2023 година, регистрациите на електрични автомобили во ЕУ се зголемија за 118,1 отсто, достигнувајќи 165.165 единици, што претставува 21 отсто од пазарот. Освен Малта (-22,6 отсто), сите пазари на Европската Унија забележаа двоцифрен и троцифрен процентуален раст, а германскиот пазар, инаку најголем по обем, забележа раст од неверојатни 170,7 отсто.
Белгија забележа највисока стапка на раст од 224,5 отсто. Севкупно, продажбата на електрични автомобили со батерии се зголеми за значителни 62,7 отсто, со речиси еден милион возила регистрирани во периодот од јануари до август.
Што се однесува до хибридите, во август годинава нивниот број е зголемен за 29 отсто, пред сè поттикнат од силниот раст на три од четирите најголеми пазари: Германија (+59 отсто), Франција (+38,7 отсто) и Шпанија (+21,5 отсто), додека Италија забележа мал пад (-2,3 отсто). Ова резултираше со кумулативен пораст од 28,6 отсто, со речиси 1,8 милион продадени возила во периодот од јануари до август, што претставува четвртина од вкупниот пазар.
Минатиот месец регистрациите на нови плагин-хибридни автомобили во ЕУ се зголемија за 5,5 отсто, на вкупно 58.557 возила. Силната продажба на големите пазари, како што се Холандија (+44,7 отсто), Франција (+40,5 отсто) и Шведска (+24,9 отсто), помогна да се компензира падот во Германија (-41,1 отсто). И покрај овој раст, пазарниот удел на плагин-хибридни автомобили се намали на 7,4 од 8,5 отсто во август оваа година.
Bloomberg Mercury
Дизелите сè уште се во пад
Во август пазарот на бензински автомобили во ЕУ забележа мал раст, за 2,1 отсто, иако пазарниот удел на бензинските возила е намален од 38,7 на 32,7 отсто во однос на август минатата година. Солидните перформанси во Италија (+25,3 отсто) и Франција (+21,5 отсто) беа главниот двигател на растот, додека повеќето други пазари забележаа падови.
Од друга страна, пазарот на автомобили на дизел продолжи да опаѓа во август (-6 отсто), и покрај растот во Германија (+9,2 отсто) и пазарите во Централна и Источна Европа, особено Словачка (+22,6 отсто) и Романија (+19 отсто). Дизелите сега имаат пазарен удел од 12,5 отсто, што е намалување во однос на 16,1 отсто во август минатата година, објави ACEA.
